अटो लोनको जोखिम भार घट्ने, सवारी साधनको बिक्रीमा सुधार आउने

नेपाल राष्ट्र वैंकले चालु आर्थिक वर्षदेखी अटो लोनमा जाने कर्जाको जोखिम भार पुनरावलोकन गर्ने घोषणा गरेको छ । आइतवार मौद्रिक निती सार्वजनिक गरेर सेयर धितोमा जाने कर्जा, घरजग्गा तथा हायर पर्चेज(अटोलोन) मा जाने कर्जाको जोखिम भार कम गर्ने राष्ट्र वैंकले घोषणा गरेको हो ।

यी क्षेत्रमा जाने कर्जामा हाल १५० प्रतिशत जोखिमभार लाग्दै आएको छ । जोखिमभार उच्च भएका कारण वैंक तथा वित्तिय संस्थाले अटोलोन प्रवाहमा रुची नदेखाएको र सोही प्रावधानका कारण बजारमा सवारीसाधन बिक्री हुन छाडेको अटोमोवाइल व्यावसायीले बताउँदै आएका थिए ।

उनीहरुले हालको जोखिमभारलाई घटाएर पुरानै दरमा ल्याउन दवाव दिँदै आएका थिए । यसअघि अटोलोनमा जाने कर्जाको जोखिमभार ७५ प्रतिशत रहँदै आएको थियो । पुरानै दरमा ल्याउन नसकिएपनि यस्तो भार वढीमा १०० प्रतिशत भन्दा धेरै हुन नहुने उनीहरुले माग गर्दै आएका थिए ।

जोखिभार कम भएसंगै वैंक तथा वित्तिय संस्थाले अटो लोन प्रवाहलाई खुकुलो बनाउँदै जाने र यसले सवारीसाधनको बिक्रीमा सुधार ल्याउने व्यावसायीले आशा व्यक्त गरेका छन् ।