७१० किलोमिटर रेन्ज दिने चांगनको नयाँ इलेक्ट्रिक कार सार्वजनिक

चिनीयाँ अटो निर्माता चांगनले नयाँ इलेक्ट्रिक सेडान क्यूवान ए–०७ सार्वजनिक गरेको छ । सो नयाँ इलेक्ट्रिक कारमा कम्पनीले ५८ र ८० किलोवाट आवर क्षमताको व्याट्री अप्सन दिएको छ । जसमध्ये ५८ किलोवाटले ५१५ र लङ रेन्जले ७१० किलोमिटरसम्म रेन्ज दिने दावी गरिएको छ ।

सो नयाँ कारमा दिइएको पातलो एलइडी रनिङ लाइटको धर्सा, रिट्रयाक्टवेल डोर ह्यान्डल, ५ स्पोक ह्विलर र स्लोप रुफ लाइनले एक्सटेरियरलाई निकै आकर्षक र आधुनिक देखाएको छ । कारको लुक्स वीवाईडी हान, नीओ ईटी–७ र राइजिङ एफ–७ लगायत अन्य चिनीयाँ ब्रान्डका सेडानबाट प्रेरित भएको देख्न सकिन्छ ।

सो कारको इन्टेरियरमा डी आकारको टु स्पोक स्टेरिङ ह्विल, फेस आइडी सेन्सर, गीयर सिफ्टर र इन्स्ट्रयुमेन्ट क्लस्टरको सट्टा हेड–अप–डिस्प्ले दिइएको छ । साथै यसको सेन्टर कन्सोलमा १५ इन्चको फ्लोटिङ स्क्रिन र दुईवटा वायरलेस चार्र्जिङ प्याड लगायत फिचर उपलब्ध गराइएको छ भने कारको फ्रन्ट पिल्लर र रुफ माइक्रो फाइवरले कभर गरिएको छ ।

दुई वर्षपछि बजारमा आउने वताइएको सो नयाँ कारको मूल्य चीनमा २८ हजार डलर हाराहारी पर्ने अनुमान गरिएको छ ।चांगन नेपाली बजारमा समेत उपलब्ध रहेका कारण भाविष्यमा सो नयाँ कार नेपाल समेत भित्रिन सक्ने अनुमान गर्न सकिन्छ ।