जेठमा ७८१ विद्युतीय गाडी यातायात कार्यालयमा दर्ता, दर्ताकै लागि धेरै जनशक्ति खर्चिदै ईभी ब्रान्ड

काठमाडौं – चालु आर्थिक वर्षको जेठ महिनामा ७८१ युनिट विद्युतीय गाडी यातायात कार्यालयहरुमा दर्ता भएका छन्।

यातायात व्यवस्था कार्यालय सानाठुला सवारीका अनुसार यो जेठ महिनामा लगभग ७८१ युनिट विद्युतीय गाडी दर्ता भएका छन्। यसभन्दा अघिका महिनाहरुमा लगभग साँढे ४ सय युनिटभन्दा धेरै ईभी दर्ता हुने गरेका थिएनन् ।

जेठमा पेट्रोल र ईभी गरेर लगभग १७९१ नयाँ गाडी दर्ता भएका कार्यालयले जनाएको छ। यसमा ७८१ युनिट ईभी दर्ता भएको यातायात व्यवस्था कार्यालय सानाठुला सवारी कायालयकाअधिकृत पवित्र कुँवरले बताए। यसमा पेट्रोल कार, जिप र भ्यान ९६५ वटा दर्ता भएका छन्। अन्य ४५ वटा सवारीसाधान दर्ता भएका छन्।

चालु आर्थिक वर्षको १० महिनासम्ममा ७ हजार ४५१ सवारीसाधान दर्ता भएका छन्। जसमा १० महिनासम्ममा २ हजार ८८८ युनिट ईभी दर्ता भएका छन्। यसले अब ११ महिनामा कुल ३ हजार ६६९ युनिट विद्युतीय कार, जिप र भ्यान दर्ता भएका छन्।

बैशाख महिनामा जम्मा ३३५ युनिट ईभी दर्ता भएका थिए। यस्तै, चैतमा २७२ युनिट, फागुनमा २०२, माघमा ४२२, पुसमा ६८, मंसिरमा ३१५, कात्तिकमा ३३६, असोजमा ३०८, भदौमा ३२७ र साउनमा ३०३ युनिट दर्ता भएका छन्।

यस्तै यो महिना विद्युतीय सवारीको आयात पनि हालसम्मकै धेरै भएको छ। जसमा यो महिना मात्र ८६० युनिट ईभी नेपाल भित्रिएका भन्सार कार्यलयहरुले जनाएका छन्। चालु आर्थिक वर्षको ११ महिनामा ३ हजार ७८० युनिट ईभी नेपाल भित्रिएका छन्। जसमा एमजी र बीवाईडीको मात्र धेरै ईभी यो महिना आयात भएका छन्।

कुँवरका अनुसार बजेटपछि यातायात कार्यलयमा ईभी दर्ता गर्न कम्पनीहरुले आफ्ना ५ जनासम्म स्टाफ राख्ने गरेका छन् । फाइल तस्बिर