औपचारिक रुपमै सञ्चालनमा आयो साझा यातायातको मोबाइल एप, यस्तो छ चलाउने तरिका

काठमाडौं – साझा यातायातले ‘साझा प्लस’ एप औपचारिक रूपमा सञ्चालनमा ल्याएको छ । सो एपका माध्यमबाट काठमाडौं उपत्यकामा आफ्नो नजिकका साझा यातायातका बसहरू कहाँ र कुन अवस्थामा छन्, सबै जानकारी लिन सकिने कम्पनीले जनाएको छ ।

“हाम्रो एपले नजिकका बस र रुटको रियल टाइम (वास्तविक समय) को जानकारी उपलब्ध गराउनेछ,” कम्पनीले विज्ञप्तिमा भनेको छ, "हाम्रो अन्तर्क्रियात्मक नक्साको फिचर प्रयोग गरेर आत्मविश्वासका साथ सहर ‘एक्स्प्लोर’ गर्न सक्नुहुनेछ ।”

यसबाट वास्तविक समयमा बस ट्रयाक समेत गर्न सकिने कम्पनीको भनाइ छ । सो एप प्रयोग गर्न एन्ड्रोइड प्रयोगकर्ताले यहाँ र आईओएस प्रयोगकर्ताले यहाँ क्लिक गरेर डाउनलोड गर्न सकिन्छ ।

यसरी गर्न सकिन्छ साझा प्लस एपको प्रयोग
माथिको लिंकमा क्लिक गरेर एप डाउनलोड गरिसके पछि त्यसलाई खोल्ने र गेट स्टार्टेड (Get Started) बटनमा ट्याप गर्ने । त्यसपछि स्क्रिनमा देखिएको साइन इन विथ गुगल (Sign in with google) बटनमा थिच्ने र आफूलाई उपयुक्त हुने गुगल एकाउन्ट छान्ने । त्यसपछि एप खुल्छ ।

यसरी एपमा साइनअप गरिसकेपछि विभिन्न रुटहरू देखिन्छ । त्यस्ता रुटमा क्लिक गरी कुन बस गुडिरहेको छ, कुन बस कुन रुटमा रोकिएको छ भन्ने कुराको जानकारी पाउन सकिन्छ ।

त्यसबाहेक स्टेसन कहाँ छ, आफ्नो नजिक कुन बस कति बजे आइपुग्छ, कतिको स्पिडमा गुडिरहेको छ भन्ने कुराको जानकारी समेत पाउन सकिन्छ ।

यसबाट साझा यातायातको वारेमा सबै जानकारी पाउन सकिने भएकाले एप उपयोगी हुने सक्ने अनुमान गर्न सकिन्छ ।