बजेटपछि यी इलेक्ट्रिक कारमा भयो मूल्य समायोजन, टाटा नेक्सनको कहिले ?

आगामी आर्थिक वर्षको बजेटमा ५१ देखि १०० किलोवाट क्षमतासम्मका इलेक्ट्रिक कारमा भन्सार र अन्तःशुल्क वढेपछि सो सेग्मेन्टका कार आयात गरी कारोवार गर्दै आएका अधिकांश कम्पनीले मूल्य समायोजन गरिसकेका छन् । हालसम्म एमजी, नेटा, बीवाईडी र हुन्डाईले मूल्य समायोजन गरेका छन् भने यो सेग्मेन्टमा सवैभन्दा बढी माग हुँदै आएको टाटा नेक्सनका वारेमा भने आधिकारिक वितरक सिप्रदी ट्रेडिङ हालसम्म मौन वसेको छ ।

मूल्य समायोजन गरेका कम्पनीले लगभग पुरानै मूल्यलाई निरन्तरता दिएका छन् । जवकी भन्सारमा ५ प्रतिशतले वृद्धि र अन्तःशुल्क १० प्रतिशत लाग्ने प्रावधान अनुरुप पुरानो मूल्यमा २० प्रतिशतसम्म मूल्य वृद्धि हुने अपेक्षा गरिएको थियो तर, यो सेग्मेन्टको बजार विस्तार हुँदै गएको र मूल्यमा प्रतिस्पर्धा गर्न नसकिए बजार गुम्ने भयले विक्रेता कम्पनीले आफ्नो मार्जिनको हिस्सा नै कम गरी पुरानो मूल्यमा थोरै रकम वृद्धि गरेर मूल्य समायोजन गरेको सहजै अनुमान गर्न सकिन्छ ।

बजेट आए लगत्तै नेटा भी बिक्रता सीजी मोटर्सले पुरानो मूल्यमा १ लाख रुपैयाँ वृद्धि गरेर नयाँ मूल्य ३९ लाख सार्वजनिक गर्यो । त्यसको केही दिनपछि एमजी जेडएस ईभी बिक्रेता पारामाउन्ट मोटर्सले सो एसयूभीमा जम्मा ५० हजार रुपैयाँ वृद्धि गरेर नयाँ मूल्य सूची ल्यायो । बजेटअघि ५२ लाख ४९ हजार रुपैयाँमा बिक्री हुँदै आएको जेडएस ईभीको नयाँ मूल्य ५२ लाख ९९ हजार निर्धारण गरिएको छ ।

यी दुई कम्पनीले पुरानो मूल्यमा थोरै रकम वृद्धि गरेपछि बीवाईडी, हुन्डाई र टाटा माथि तत्कालै मूल्य समायोजन गर्नुपर्ने दवाव सिर्जना भएको थियो । सोही आधारमा बीवाईडी बिक्रेता साइमेक्स इंकले बजेटअघि ६४ लाख ९० हजारमा बिक्री गर्दै आएको एट्टो ३ मा १ लाख रुपैयाँ वृद्धि गरेर ६५ लाख ९० हजार तय गर्यो । साथै कम्पनीले ५० किलोवाट आवर क्षमताको ब्याट्री प्याकमा समेत सो एसयुभीलाई ल्याउने भन्दै नयाँ मूल्य सार्वजनिक गरेको छ । एजमी जेडएस र टाटा नेक्सन ईभीसँग मूल्यमा प्रतिस्पर्धा गर्ने गरी कम्पनीले सो एसयूभीलाई ५५ लाख ९९ हजार रुपैयाँमा उतार्न लागेको आँकलन गरिएको छ ।

हुन्डाईको कोनामा बिक्रेता कम्पनी लक्ष्मी इन्टरकन्टिनेन्टल प्रालिले जम्मा एउटा मात्रै भेरिएन्टमा ४० हजार रुपैयाँले मूल्य वृद्धि गरेको छ । कुल तीन भरिएन्टमा उपलब्ध कोनाको टप भेरिएन्ट जीएलएसमा ४० हजारले वृद्धि भई ६४ लाख ९६ हजार पुगेको छ भने वाँकी दुई भेरिएन्ट एनएस र जीएलमा पुरानै मूल्य यथावत गरिएको छ । यी दुई भेरिएन्टलाई कम्पनीले क्रमश ६० लाख ९६ हजार र ६१ लाख ९६ हजारमा बिक्री गर्दै आएको छ ।

सो सेग्मेन्टमा सर्बाधिक बिक्री हुने नेक्सन ईभीमा बिक्रेता कम्पनी सिप्रदी ट्रेडिङले भने हालसम्म मूल्य समायोजन गरेको छैन । मूल्य समायोजनको विषयमा मौन वस्दै आएको कम्पनीले सम्भवतः पुरानै मूल्यलाई निरन्तरता दिन लागेको हो कि भनेर समेत अड्कलबाजी गर्न थालिएको छ ।

आफ्ना प्रतिस्पर्धी ब्रान्डले लगभग पुरानै मूल्यलाई निरन्तरता दिएको कारण कम्पनीमाथि धेरै अन्तरले मूल्य वृद्धि नगर्न दवाव सिर्जना गराएको छ भने बजारमा सवैभन्दा वढी माग हुँदै आएको मोडल भएका कारण उसले पुरानै मूल्यलाई निरन्तरता दिनसक्ने समेत आँकलन गरिएको छ । अन्य ब्रान्डले वढीमा १ लाखसम्म मात्र वृद्धि गरेका कारण नेक्सन ईभीमा मूल्य समायोजन भए पनि सो भन्दा वढी वृद्धि नहुने लगभग पक्कापक्की जस्तै देखिन्छ । नेक्सन ईभीलाई कम्पनीले हाल ३९ देखि ४४ लाख रुपैयाँसम्ममा बिक्री गर्दै आएको छ भने अर्को नयाँ भेरिएन्ट ईभी म्याक्सको मूल्य ४६ लाख ४९ हजार रुपैयाँ पर्छ ।