किया सेल्टोस ४६ महिनामा ५ लाख बिक्री, नयाँ फेसलिफ्ट लन्च गर्ने तयारीमा

किया इन्डियाको प्रिमियम एसयूभी सेल्टोसले लन्च भएको ४६ महिना भित्रमा ५ लाख युनिट बिक्रीको आँकडा पार गरेको छ । सो एसयूभी सन् २०१९ मा लन्च भएको थियो ।

मेक इन इन्डिया, फर द वर्ल्डको नाराको साथमा पेश गरिएको सेल्टोस एसयूभीले ग्राहकको मन र विश्वास जितेको र सबैभन्दा लोकप्रिय र भरपर्दो अटोमोटिभ ब्रान्ड बनेको छ । किया इन्डियाको बिक्रीमा ५५ प्रतिशत योगदान सेल्टोसको रहेको छ । सेल्टोसका १ लाख ३५ हजार ८८५ युनिट बढी निर्यात भइसकेको छ ।

सेल्टोसले भारतीय बजारमा हुन्डाई क्रेटा, टाटा ह्यारियर, एमजी हेक्टर, स्कोडा कुशांक र निसान किकसँग प्रतिस्पर्धा गर्छ । मिडिया रिपोर्टका अनुसार किया इन्डियाले जुलाई २०२३ मा किया सेल्टोस फेसलिफ्ट सार्वजनिक गर्ने तयारी गरिरहेको छ ।

किया सेल्टोस म्यानुअल र अटोमेटिक गियरबक्स विकल्प सहित पेट्रोल र डिजेल इन्जिन दुवै विकल्पमा उपलब्ध छ । हाल यो हुन्डाई क्रेटा पछि भारतमा दोस्रो मिड एसयूभी हो । कम्पनीले भारतमा २०२३ को पहिलो त्रैमासिकमा एसयूभीको २७ हजार युनिट बेचेको थियो ।

नेपाली बजारमा पनि किया सेल्टोस उपलब्ध छ र यसको बिक्री तुलनात्मक रुपमा राम्रो छ ।