माइलेज ७०, वारेन्टी १० वर्ष

भारतमा हालै सार्वजनिक गरिएको होन्डाको नयाँ मोटरसाइकल साइन १०० चर्चित बन्दै गएको छ । बजारमा प्रचलित हिरोको स्प्लेन्डरलाई टक्कर दिने अनुमानका साथ बजारमा उपलब्ध गराइएको सो मोटरसाइकलमा विभिन्न फिचर छन् ।

सबैभन्दा महत्वपूर्ण फिचरको रुपमा यसको माइलेजलाई लिइएको छ । यसको माइलेज ७० किलोमिटर प्रतिलिटर भएको कम्पनीको भनाइ छ ।

त्यसैगरी यसमा १० वर्षको वारेन्टी हुने कम्पनीको भनाइ छ । यस अनुसार ३ वर्ष स्ट्यान्डर्ड वारेन्टी र ७ वर्ष एक्सटेन्डेड वारेन्टी हुनेछ । एक्सटेन्डेड वारेन्टीका लागि ग्राहकले छुट्टै रकम तिर्नु पर्नेछ ।

यो नयाँ मोटरसाइकलमा होन्डाले ९९.७ सिसीको फ्यूल इन्जेक्टेड इन्जिन दिएको छ । जसको पावर ७.६१ एचपी र टर्क ८.०५ एनएम छ । ४ स्पिड गियरवक्स जडान गरिएको यो नयाँ वाइकमा होन्डाले ओविडी–टु र ई२० कम्प्लायन्ट नयाँ इन्जिन दिएको छ । जसका कारण यसलाई २० प्रतिशत इथानोल मिश्रण गरेर समेत चलाउन सकिन्छ ।

होन्डाले यो नयाँ वाइकका लागी भनेर डायमन्ड–टाइप फ्रेम विकास गरेको थियो । सोही फ्रेममा तयार भएको साइन १०० को अगाडी टेस्किपिक र पछाडी ट्विन शक एव्जर्वर पाउन सकिन्छ । यसको दुवै चक्कामा ड्रम व्रेक जडान गरिएको छ भन तौल १०० किलोग्राम भन्दा कम रहेको छ । यो नयाँ वाइकको ग्राउन्ड क्लिरियन्स १६८ एमएम रहेको छ ।

कम वजेटको सानो सिसी वाइक भएका कारण होन्डाले यसमा पर्याप्त फिचर भने दिएको छैन । साइन १०० मा हेलोजन हेडलाइट र एनालग इन्स्ट्रयूमेन्ट क्लस्टर पाउन सकिन्छ । साथै यसमा होन्डाको कम्वी व्रेकिङ सिस्टम, फ्यूल इन्जेक्सन र अटो–चोक सिस्टम उपलब्ध छ ।

साइन १०० नेपाली बजारमा समेत आउने आँकलन गरिएको छ । भारतमा यसको मूल्य ६४ हजार ९०० रुपैयाँ निर्धारण गरिएको छ । यो मोटरसाइकलले हिरो एचएफ १०० तथा स्प्लेन्डर प्लस र बजाज प्लाटिनासंग प्रतिस्पर्धा गर्नेछ ।