रिम्याक नेभेरा इलेक्ट्रिक हाइपरकारको नाममा एकैपटक बन्यो २३ वटा रेकर्ड

क्रोएसियाली कार कम्पनी रिम्याक अटोमोबिलीको इलेक्ट्रिक हाइपरकार नभेराले आफ्नो नाममा नयाँ रेकर्ड बनाएको छ । यो कारले कुल २३ वटा कीर्तिमान बनाएको छ ।

सो कारले १.८१ सेकेन्डमा ० बाट १०० किलोमिटर प्रतिघण्टाको गतिमा पुग्ने पहिलो कीर्तिमान बनाएको हो । साथै सो कारले ४.४२ सेकेण्डमा ० देखि २०० किमी, ९.२२ सेकेण्डमा ० देखि ३ सय किमी र २१.३१ सेकेण्डमा ० देखि ४ सय किमीको गति हासिल गरेको छ ।

रिम्याकको नेभरा इलेक्ट्रिक कारले भन्दा पहिले यो रेकर्ड आईसी इन्जिन भएको कोनिगसेग रेगेराको नाममा थियो । जसले ३१.४ सेकेन्डमा यो कीर्तिमान बनाएको हो ।

कम्पनीको वेबसाइटका अनुसार यसमा ४ वटा विद्युतीय मोटर प्रयोग गरिएको छ । जसले २ हजार बीएचपीभन्दा बढी पावर जेनेरेट गर्छ ।

कम्पनीले हाइपर इलेक्ट्रिक कारमा १२० किलोवाटको ब्याट्री जडान गरिएको छ । ब्याट्री बेलनाकार ढाँचामा कुल ६९६० सेल प्रयोग गरिएको छ । यसको अधिकतम भोल्टेज ७३० भोल्ट छ र यसलाई ० देखि ८० प्रतिशत चार्ज गर्न १९ देखि ३० मिनेटको समय लाग्छ । फुल चार्ज पछि यसको डब्ल्युएलटीपी रेन्ज ४९० किमी सम्म छ ।

नेभेरा इलेक्ट्रिक हाइपर कारमा फ्रन्ट एयरब्याग र साइड एयरब्याग छ । यसको साथै यसमा ट्रयाक्सन कन्ट्रोल, स्टेबिलिटी कन्ट्रोल, ईएसपी, एबीएस र एडीएएस पनि दिइएको छ । यसको एडीएएसमा १३ क्यामेरा, ६ रडार र १२ अल्ट्रासोनिक सेन्सर छ ।