नयाँ क्रसओभर कार सी३एक्स ल्याउने तयारीमा सिट्रोन

भारतमा लगातार आफ्नो बिक्री बढाउने प्रयासमा रहेको सिट्रोनले अब अर्को नयाँ क्रसओभर सेडान कार भारतमा ल्याउने तयारी गरिरहेको छ । कम्पनीले आधिकारिक रुपमा जानकारी सार्वजनिक नगरे पनि यसको वारेमा समाचार सार्वजनिक भएका छन् ।

रिपोर्टका अनुसार कम्पनीले नयाँ क्रसओभर सी३एक्स उपलब्ध गराउने छ । यसको कोड नेम सीसी २२ राखिएको छ यो सीएमपी प्लेटफर्ममा निर्माण गरिने छ । यो कार कम्प्याक्ट वा मिड साइज सेग्मेन्टमा ल्याउने अनुमान गरिएको छ । यही प्लेटफर्ममा कम्पीले सी३ ह्याचब्याक र सी३ एयरक्रस पनि बनाएको थियो ।

यसमा एलईडी लाइट, आकर्षक डिजाइन, साधारण इन्टेरियर, सुरक्षाका लागि अत्यावश्यक फिचरसहित धेरै भेरिएन्टमा ल्याउनेछ । साथै यसमा १० इन्चको इन्फोटेनमेन्ट सिस्टम, डिजिटल इन्स्ट्रयुमेन्ट क्लस्टर, स्टेयरिङ ह्विलमा कन्ट्रोल पनि दिइएको छ ।

कम्पनीले यसमा १.२ लिटर नेचुरल एस्पिरेटेड र टर्बो चार्ज इन्जिन विकल्प पनि उपलब्ध गराउनेछ । सो कार पेट्रोल इन्जिनमा मात्र ल्याइनेछ । यसका लागि हाइब्रिड वा अन्य इन्जिन विकल्प हुनेछैन ।

मिडिया रिपोर्टका अनुसार सिट्रोनले यो सेडान कार यो वर्षको अन्त्यसम्म वा अर्को वर्षको पहिलो चौमासिकसम्म भारतीय बजारमा ल्याउन सक्नेछ । यसको इलेक्ट्रिक भर्सन सन् २०२३ को अन्त्य वा २०२५ सम्ममा पेश गर्नेछ ।

सो कार भारतीय बजारमा मिड साइज भर्सनमा लन्च गरेमा होन्डा सिटी, मारुती सियाज, हुन्डाई भर्ना, स्कोडा स्लाभिया, फक्सवागन भर्टस जस्ता कारसँग प्रतिस्पर्धा गर्नेछ । तर यसलाई कम्प्याक्ट सेग्मेन्टमा ल्याइयो भने यसले मारुती डिजायर, हुन्डाई औरा, टाटा टिगोर, होन्डा अमेज जस्ता कारसँग प्रतिस्पर्धा गर्नुपर्नेछ ।

नेपालमा पनि सांग्रिला मोटर्सले सिट्रोनका कार बिक्री–वितरण गरिरहेको छ । हालै मात्र नेपाली बजारमा सी३ एसयूभी भित्रिएको छ । भविष्यमा नयाँ मोडल समेत उपलब्ध हुने अनुमान गर्न सकिन्छ ।

तस्बिर : सिट्रोन सी३