भौतिक पूर्वाधार तथा यातायात मन्त्री ज्वालाको भनाइ : एक वर्ष भैसक्यो मेरो सवारी लाइसेन्स आएन

काठमाडौं – भौतिक पूर्वधार तथा यातायात मन्त्री प्रकाश ज्वालाले सवारी लाइसेन्स छिटो दिने व्यवस्था गरिने बताएका छन् ।

बिहीबार काठमाडौंमा नेपाल आर्थिक पत्रकार संघ र नाडा अटोमोबाइल्स् एसोसिएसन अफ नेपालको सहकार्यमा आयोजित एक अन्तरक्रिया कार्यक्रममा मन्त्री ज्वालाले १ वर्ष वितिसक्दा पनि लाइसेन्स नपाएको बताए ।

उनले भने, ‘एक वर्ष भइसक्यो लाइसेन्स प्रिन्ट भएर आएको छैन।’

यातायात व्यवस्था कार्यालयका कर्मचारीले लाइसेन्स प्रिन्ट गरिदिउँ भनेपनि क्यूमै राख्न लगाएको उनले बताए ।

‘कार्यालयका साथीभाईले मन्त्रीज्यू लाइसेन्स प्रिन्ट गरिदिउँ कि भन्नुभयो, तर मैले भने होइन, सर्वसाधारणको झै क्यूमा राख्नुहोस्, कैले पालो आउँदो रहेछ त्यही बेला लिउँला ।’ मन्त्री ज्वालाले भने ।

अहिले सवारी लाइसेन्स पास भएको डेढ वर्षसम्म पनि प्रायः लाइसेन्स प्रिन्ट भएर आउँदैन । यातायात व्यवस्था कार्यालयले भने प्रिन्ट भएर आउन कम्तिमा ६ महिना समय लाग्ने र ६ महिना पछि लाइसेन्स पाइने बताउँदै आएको छ ।