एउटा अञ्चलबाट लिएको ड्राइभिङ लाइसेन्स अर्को अञ्चलबाट रिन्यु गर्न मिल्छ कि मिल्दैन ? के छ व्यवस्था ?

हाल एउटा अञ्चलबाट लिएको ड्राइभिङ लाइसेन्स अर्को अञ्चलबाट रिन्यु गर्न सकिने व्यवस्था छैन । सरकारले यसको लागि प्रतिवद्धता जनाउने र कानुनमा पनि यस सम्बन्धी व्यवस्था भए पनि व्यवहारमा यो लागू हुन सकेको छैन ।

काठमाडौं उपत्यकाको हकमा एउटा यातायात कार्यालयबाट लिएको ड्राइभिङ लाइसेन्स अर्को यातायात कार्यालयबाट रिन्यु भइरहेको छ । यद्यपि नेपाल प्रहरी, नेपाली सेना, निजामती कर्मचारी वा अन्य अञ्चलबाट बसाई सरेर काठमाडौं आएकाहरुका लागि भने व्यावहारिक रुपमा रिन्यु गरेको पाइन्छ । तर अन्य सामान्य अवस्थामा रिन्यु गरिएको छैन ।

कानुनले व्यवस्था गरेको भए पनि व्यावहारिक रुपमा यो कार्य लागू भएको छैन । यातायात विज्ञ माधव अधिकारी भन्छन्, ‘कानुनले व्यवस्था गरेको भए पनि धेरै लाइसेन्सहरुको रेकर्ड अद्यावधिक नभएकाले पनि यो व्यवहारमा लागू हुन नसकेको हो । यसकै कारण भोलि फेरि कानुनी झमेलामा परिएला भनेर पनि कर्मचारीहरु यस प्रकारका लाइसेन्स रिन्यु गर्न डराइरहेका हुन सक्छन् ।’

आगामी दिनमा यो कार्य अगाडि बढ्ने र सबैले सहज तरिकाले जुनसुकै अञ्चलमा दर्ता भएको ड्राइभिङ लाइसेन्स अर्को अञ्चलबाट लिने व्यवस्था हुने अपेक्षा गर्न सकिन्छ ।