चर्चामा ९९ किलोवाटको एमजी जेडएस ईभी, कस्तो रहला नेपाली बजार

इलेक्ट्रिक एसयूभी पारखीको रोजाइमा पर्न सफल एमजी जेडएस ईभी ९९ किलोवाट मोटरमा आएको छ । यसअघि १३० किलोवाट क्षमताको मोटर जडित यो एसयूभीमा सरकारले चालु आर्थिक वर्षको बजेटमार्फत व्यापक मात्राले कर वृद्धि गरेपछि मूल्य महंगो भएको थियो । मूल्य बढेकै कारण आधिकारिक विक्रेता पारामाउन्ट मोटर्सले लामो सयमदेखि यसलाई नेपाल ल्याउन सकिरहेको थिएन । १०० किलोवाट भन्दा कम मोटर क्षमतामा आएपछि यसको मूल्य समेत निकै प्रतिस्पर्धी बनेर आएको छ । यो एसयूभीको सुरुवाती मूल्य ४८ लाख ४९ हजार रुपैयाँ निर्धारण गरेर कम्पनीले बुकिङ लिन शुरुवात गरेको छ ।

ईभी बजारमा निकै नै राम्रो प्रभाव पार्न सफल नयाँ जेडएस ईभीलाई कम्पनीले गत वर्षको फागुन महिनामा बुकिङ खुल्ला गरेको थियो । बुकिङ खुल्ला भएको केही दिन भित्रै ५ सय भन्दा बढी ग्राहकले बुक गरेको यो ईभीलाई हात पार्न नपाएपछि उनीहरु निकै निराश बनेका थिए । सो समय ५१ किलोवाट आवरको ब्याट्री जडित यो ईभीलाई कम्पनीले ५१ लाख ९९ हजार मूल्य तोकेर बुकिङ लिएको थियो । साथै यसको ७२.६ किलोवाट आवरको ब्याट्री जडित लङ रेन्ज भेरिएन्टको मूल्य ५९ लाख ९९ हजार रुपैयाँ तोकिएको थियो । त्यो भन्दा अघि जेडएस ईभी ४४.५ किलोवाट आवर क्षमताको ब्याट्रीमा उपलब्ध थियो भने यसको मूल्य ५० लाख ९९ हजार कायम गरिएको थियो ।

पारामाउन्ट मोटर्सले अहिले ल्याएको ९९ किलोवाट मोटरमा पनि ५१ किलोवाट आवरकै सीएटीएल ब्याट्री जडान गरिएको छ । यो ईभी कम्फर्ट र डिलक्स गरी कुल दुई भेरिएन्टमा उपलब्ध छ । जसमध्ये कम्फर्टको मूल्य ४८ लाख ४९ हजार र डिलक्सको ५२ लाख ४९ हजार रुपैयाँ निर्धारण गरिएको हो । ९९ किलोवाट मोटरमा यो मूल्य निकै नै आकर्षक र प्रतिस्पर्धी रहेको भन्दै अहिले ईभी पारखीमाझ यसले चर्चा बटुलिरहेको छ ।

१०० किलोवाट मोटरमा हाल टाटा नेक्सन, बीवाईडी एट्टो ३ र हुन्डाई कोनाले बजारमा निकै राम्रो व्यापार गरिरहेका छन् । सो सन्दर्भमा नेपाल आएको जेडएस ईभीले ईभी पारखीलाई सजिलै आकर्षित गर्ने देखिन्छ । यो कारको मूूल्य नेक्सनभन्दा केही महंगो भएपनि एट्टो ३ र कोनाको तुलनामा निकै कम पर्ने कारण पनि नेपाली ईभी बजारमा यसले एमजीको बजार हिस्सालाई बढाउने सजिलै अनुमान गर्न सकिन्छ । अर्कोतर्फ यो सेग्मेन्टमा ५० लाख भन्दा कम मूल्यमा बिक्री हुँदै आएको एकमात्र ईभी टाटा नेक्सनलाई यसले कडा टक्कर दिने आँकलन गरिएको छ । नेक्सनको तुलनामा यसमा जडान गरिएको ब्याट्री केही ठूलो भएको कारण रेन्ज समेत बढी दिन्छ भने फिचरको मामिलामा समेत जेडएस ईभी निकै अगाडि रहेको छ ।

यस्तो छ जेडएस ईभी
एमजीको ग्लोबल डिजाइनमा आधारित जेडएस ईभीमा जडान गरिएको ब्याट्रीलाई आधा घण्टामै ८० प्रतिशत चार्ज गर्न सकिन्छ । यसको ब्याट्रीले सिंगल चार्जमै ३२० किलोमिटर रेन्ज प्रदान गर्ने दावी गरिएको छ । सो एसयूभीको ब्याट्री वारेन्टी भने ८ वर्षको रहेको छ ।

सुरक्षाको लागि यसमा ६ वटा एयरब्याग, ईएसपी, ईएबी, एचडीसी, अटो होल्ड जस्ता फिचरहरु राखिएका छन् भने मनोरन्जनका लागि डीएबी रेडियो र ब्लुटुथयुक्त १०.१ इन्चको इन्फोटेनमेन्ट सिस्टम आदि उपलब्ध छ । यसको डिलक्स भेरिएन्टमा दिइएको पानारोमिक सनरुफ, हिटेड फ्रन्ट सिट, वायरलेस चार्जर, ३६० डिग्री क्यामेरा, थ्रीडी साउन्ड सिस्टम र रुफरेल लगायत फिचर कम्फर्ट भेरिएन्टमा भने पाउन सकिँदैन ।

यसमा ड्राइभरको लागि ७ इन्चको डिजिटल इन्स्ट्रयुमेन्ट क्लस्टर, किलेस इन्ट्री र स्टार्ट, ड्राइभरको लागि सिक्सवे र फ्रन्ट प्यासेन्जरको लागि फोरवे इलेक्ट्रिकल एड्जस्टेबल लेदर पावर सिट, दुईवटा आईसोफिक्स चाइल्ड सिट एन्कोरेज पोइन्टहरू (आउटर रियर सिटहरू), ६०/४० फोल्डिङ रियर सिट, पावर–फोल्डिङ जस्ता फिचरहरु पाउन सकिन्छ ।