बीएमडव्लूको प्राथमिकतामा भारतीय बजार, जनवरीमा ५ नयाँ मोडल सार्वजनिक गर्दै

जर्मन अटो ब्रान्ड बीएमडव्लूले भारतीय बजारलाई उच्च प्राथमिकतामा राखेको छ । लक्जरी व्रान्डका रुपमा परिचित विएमडव्लूले जनवरी महिनामा मात्र ५ नयाँ मोडललाई लन्च गर्ने तयारी थालेसंगै उसका लागि भारतीय वजार उच्च प्राथमिकतामा परेको पुष्टि भएको हो । भारतमा पछिल्लो समय बीएमडव्लू लगायत अन्य महंगा र विलासी ब्रान्डका कारको माग उच्च हुँदै गएको छ ।

भारतमा आयोजना हुन गैरहेको अटो एक्स्पो २०२३ मा यी कार सार्वजनिक गर्ने कम्पनीले योजना बनाएको छ । यी मध्ये केही मोडल फेसलिफ्ट हुने र अन्य मोडल अन्तराष्ट्रिय बजारमा वेस्ट सेलरका रुपमा परिचित रहने जनाइएको छ । बीएमडव्लूले केही दिन पहिलेमात्र एक्सएम पर्फमेन्स एसयूभी, एम३४०आई इलेक्ट्रिक कार र एस १०० आरआर मोटरसाइकल सार्वजनिक गरेको थियो ।

कम्पनीले सार्वजनिक गर्न लागेको नयाँ कारमा नयाँ ७ सिरीज, आई७, एक्स७ रिफ्रेस, थ्री सिरिज ग्रान लिमो र न्यू एक्स१ मोडल रहेका छन् । यी मध्ये आई७ र इलेक्ट्रिक एसयूभी हो भने अन्य कम्वस्चन इन्जिन जडित कार हुन् ।

न्यू ७ सिरीजलाई उसले ३.० लिटर इनलाई सिक्स–डिजेल, ३.० लिटर इनलाई सिक्स–पेट्रोल र ४.४ लिटर ट्विन टर्वो भ८ इन्जिन गरी कुल तीन ओटा इन्जिन अप्सनमा उतार्ने तयारी गरिरहेको छ । यी गाडीको पावर क्रमश २९९ एचपी, ३८० एचपी र ५३४ एचपी रहेको छ । कारमा ३१.३ इन्चको रुफ माउन्टेड र ८के सिनेमा स्क्रिन लगायत फिचर्स उपलब्ध छ ।

यसैगरी इलेक्ट्रिक कार आई७ सेडानमा १०१.७ किलोवाट आवरको व्याट्री प्याक जडान गरिएको छ भने यसले ६२५ किलोमिटरसम्मको रेन्ज प्रदान गर्ने दावी गरिएको छ । यो कारको पावर ५४४ एचपी रहेको छ ।

अर्को रिफ्रेस एक्स७ मा अपडेट गरिएको ४०आई इन्जिन जडान गरिएको छ । यो कारको पावर पेट्रोल इन्जिनको ३८० एचपी र डिजेलको ३५२ एचपी रहेको छ । यो माइल्ड हाइव्रिड अप्सनमा समेत उपलब्ध हुनेछ । कारमा १२.३ इन्चको डिजिटल इन्स्ट्रयुमेन्ट क्लस्टर, १४.९ इन्चको टचस्क्रिन र परिमार्जन गरिएको क्याविन लगायत विशेषता छन् ।

बीएमडव्लू नेपाली बजारमा समेत उपलब्ध रहँदै आएको ब्रान्ड हो । यो ब्रान्डका कारलाई लक्ष्मी ग्रुप अन्तर्गतको लक्ष्मी प्रिमियमले आयत गरी कारोवार गर्दै आइरहेको छ । नेपाली बजारमा यसको एक्स१, एक्स२ एक्स३, एक्स५ र ७ सिरिज लगायत मोडल बिक्री हुँदै आइरहेको छ ।