तपाईको ब्लुबुक हरायो ? अब के गर्ने ?

र्दैनिक जीवनमा विभिन्न समस्याको सामना गर्नु पर्ने हुन्छ । ती मध्ये आफ्नो सवारी साधनको ब्लुबुक अर्थात बिल बुक हराउन पनि सक्छ । ड्राइभिङ गर्दा जहिले पनि साथमा राख्नु पर्ने र अपटुडेटको अवस्थामा हुनु पर्ने ब्लुबुक नै हरायो भने ट्राफिकले थप जरिवाना तिराउने अवस्था हुन्छ । त्यसैले समयमै नयाँ ब्लुबुक लिनु आवश्यक हुन्छ ।

तर ब्लुबुक नयाँ निकाल्नका लागि भने केही प्रक्रिया अपनाउनु आवश्यक हुन्छ । यसका लागि सबैभन्दा पहिले ट्राफिक प्रहरी कार्यालयबाट सिफारिस पत्र लिनु आवश्यक हुन्छ ।

सिफारिस पत्र लिनका लागि काठमाडौं उपत्यकाको सन्दर्भमा सिंहदरबार बग्गीखानामा जानु पर्छ । त्यहाँ उपलब्ध एक फारम भरेर बुझाएको केही दिन भित्र ब्लुबुक हराएको र कतै नभेटिएको सिफारिस पत्र ट्राफिक प्रहरीले उपलब्ध गराउछ ।

त्यही पत्र लिएर यातायात व्यवस्था कार्यालयमा जानु पर्छ । साथमा हालसालै खिचिएको पासपोर्ट साइजको फोटो र ५ सय रुपैयाँ राजस्व तिरेको रसिद सहित डुप्लिकेट ब्लुबुकका लागि निवेदन दिनु पर्छ । यदि आफ्नो सवारी साधनको राजस्व समयमै तिरेको वा बिमा लगायतका सुविधाहरु पनि अपटुडेट छैन भने त्यही अनुसार राजस्व तिरेर अपटुडेट गर्नु आवश्यक हुन्छ । ब्लुबुक रिन्यु गर्ने मिति पनि पुग्न थालेको छ भने त्यही समयमा गर्न सकिन्छ ।

यो अवस्थामा यातायात व्यवस्था कार्यालयमा उपलब्ध आफ्नो सवारी साधन सम्बन्धी सबै डकुमेन्ट पनि खोजी गर्नुपर्छ । त्यसैका आधारमा कार्यालयले अर्को ब्लुबुक उपलब्ध गराउछ ।

यातायात व्यवस्था कार्यालयमा प्रायः विभिन्न कार्यका लागि जम्मा भएका सेवाग्राहीहरुको भीड हुन्छ । यसकारण ब्लुबुक लिने कार्य पनि त्यति सहज हुँदैन । यसले गर्दा सके सम्म आफ्नो ब्लुबुक नहराउनु नै उत्तम हुन्छ ।