प्रतिबन्धको असर : असारमा सबैभन्दा कम २९ करोडको कार आयात

काठमाडौं – सरकारले १ हजार ५ सय सीसी भन्दा बढी क्षमताका कार, जिप र भ्यानको आयातमा रोक लगाएसँगै यस्ता सवारी साधनको आयात ह्वात्तै घटेको छ । आर्थिक वर्ष २०७८/७९ को अन्तिम महिना अर्थात असारमा करिव २९ करोडको कार, जिप र भ्यान मात्र आयात भएको छ ।

भन्सार विभागको तथ्यांक अनुसार सो आर्थिक वर्षको असोज महिनामा सबैभन्दा बढी अर्थात २ अर्ब ७५ करोडको कार, जिप, भ्यान आयात भएका छन् । त्यसपछि भदौमा २ अर्ब ३४ करोड र साउनमा १ अर्ब ५४ करोडका ती सवारी साधन आयात भएका छन् ।

चौथो नम्बरमा जेठ महिनामा १ अर्ब ५० करोडका कार, जिप र भ्यान आयात भएका छन् ।

तथ्यांक अनुसार कात्तिक महिनामा १ अर्ब ७४ करोड, मंसिर महिनामा १ अर्ब २९ करोड, पुस महिनामा १ अर्ब २० करोड, माघ महिनामा ८८ करोड र फागुन महिनामा १ अर्ब १० करोडका सवारी साधन आयात भए ।

त्यसैगरी चैत महिनामा ७९ करोड र बैशाख महिनामा १ अर्ब २१ करोडका कार, जिप र भ्यान आयात भएका छन् ।

सरकारले गत बैशाख देखि नै यस्ता सवारी साधन आयातमा प्रतिबन्ध लगाउदै आएको छ । सो प्रतिबन्ध भदौ मध्य सम्मका लागि लगाइएको छ ।

इलेक्ट्रिक सवारी साधनमा भने प्रतिबन्ध लगाइएको छैन ।