नयाँ कलर अप्सनमा आयो विएमडब्ल्यू जी ३१० आर

विएमडव्ल्यूले आफ्नो लोकप्रिय मोटरसाइकल जी ३१० आरलाई अपडेट गरेर बजारमा ल्याएको छ । भारतीय बजारमा सार्वजनिक गरिएको यो मोटरसाइकलको मूल्य हाल कारोवार भैरहेको मोडलको तुलनामा ५ हजार भारु वढी निर्धारण गरिएको छ । जसको मूल्य २ लाख ७० हजार भारु निर्धारण गरिएको हो ।

यो वाइक रेसिङ व्लू र रेसिङ रेड तथा कस्मिक व्ल्याक गरी कुल २ कलर अप्सनमा उपलब्ध छ । फिचर्स र अन्य मेकानिकल पक्षमा खासै परिवर्तन नगरिएको यो अपडेटेड मोडलमा यसअघिकै ३१३ सीसीको इन्जिनलाई निरन्तरता दिइइको छ । यो वाइकको अधिकतम पावर ९ हजार ५ सय आरपिएममा ३३ बिएचपी र टर्क ७ हजार ५ सय आरपिएममा २८ एनएम रहेको छ ।

६ स्पिड गियर वक्स जडान गरिएको यसमा स्लिपर क्लच समेत दिइएको छ । यसमा १७ इन्चको एलोई ह्विल, दुवै चक्कामा डिस्क व्रेक र डवल च्यानल एबिएस उपलब्ध गराइएको छ । यो वाइकमा पूर्णत एलइडी लाइट र डिजिटल इन्स्ट्रयुमेन्ट क्लस्टर दिइएको छ ।

यो वाइकले केटिएम ड्युक ३९० संग सिधा प्रतिस्पर्धा गर्ने देखिएको छ । भारतमा तत्कालका लागि वुकिङमात्र खुल्ला गरिएको यो मोटरसाइकल अवको केही समयपछि नेपाल समेत भित्रिने अनुमान गर्न सकिन्छ । नेपाल आउँदा यसको मूल्य १० लाख माथी पर्ने आँकलन गरिएको छ ।