साझाको विद्युतीय बसमा महिला चालक र सहचालक हुने

काठमाडौं – साझा यातायातले हालै भित्र्याएका विद्युतीय बस महिला चालकहरुले कुदाउने भएका छन् । त्यसैगरी सहचालक पनि महिला नै हुने छन् । यसका लागि तालिम आयोजना भइरहेको साझा यातायातले बताएको छ ।

त्यसका लागि चार जना महिला चालक र पाँच जना महिला सह-चालकलाई विद्युतीय बसको कार्यक्षमता र सुरक्षा प्रोटोकलबारे तालिम दिन थालिएको साझा सहकारी संस्था लिमिटेडले जनाएको छ ।

‘हाम्रो नयाँ विद्युतीय बस सञ्चालनका लागि महिला चालक र सहचालकहरुलाई प्राथमिकता दिने योजना छ । हाल ४ जना महिला चालक र ५ जना महिला सह-चालकलाई विद्युतीय बसको कार्यक्षमता र सुरक्षा प्रोटोकलबारे तालिम दिई रहेका छौँ ।’ साझा यातायातले भनेको छ ।

साझा यातायातका तीन वटा विद्युतीय गाडी यस अघि नै काठमाडौं आइपुगिसकेका छन् ।

विद्युतीय गाडी गुडाउने उद्देश्य सहित साझाका लागि चीनको नान्जिङ स्थित कारखानामा आवश्यक बस निर्माण भइरहेका छन् । पहिलो चरणमा साझाले ४० ओटा विद्युतीय बस सञ्चालनमा ल्याउनेछ ।