धेरै माइलेज दिने बाइकको खोजी : पाँच ब्रान्डका १२५ सीसी मोटरसाइकलको यस्तो छ माइलेज र मूल्य

पेट्रोलको मूल्य प्रतिलिटर १८० रुपैयाँ पुगेपछि निजी सवारी प्रयोगकर्ता सबैभन्दा बढी मारमा परेका छन् । यसमा पनि निम्न मध्यम आयस्रोत भएका मोटरसाइकल प्रयोगकर्ता धेरैै नै मारमा पर्ने देखिन्छ । यो वर्गका अधिकांश उपभोक्ताले कार्यलय प्रयोजनका लागि मोटरसाइकल प्रयोग गर्ने हुँदा उनीहरुको आयस्रोतमा असन्तुलन पैदा गर्ने देखिएको हो ।

नेपाली बजारमा अहिले १ सय सीसीदेखि २५० सीसी सम्मका मोटरसाइकल बढी मात्रामा खपत भैरहेको छ । जसमध्ये १५० सीसी सम्मका मोटरसाइकल र त्यसभन्दा माथिल्लो क्षमताका मोटरसाइकल प्रयोग गर्ने उपभोक्ताको वर्ग फरकफरक रहेको छ । प्रायः १५० सीसीसम्मका मोटरसाइकल प्रयोग गर्ने ग्राहकले माइलेजलाई बढी जोड दिने गरेका छन् भने त्यसभन्दा बढी सीसी क्षमताका मोटरसाइकल प्रयोग गर्नेहरु फिचर्स र पावर तथा पर्फमेन्समा बढी केन्द्रित बन्ने गरेको पाइन्छ ।

मोटरसाइकलको सीसी जतिमात्रामा बढ्दै गयो त्यसले दिने माइलेज समेत सोही अनुपातमा कम हुँदै जाने कारण अहिलेको अवस्थामा ग्राहकले कम सीसीका मोटरसाइकललाई बढी मात्रामा रुचाउने देखिन्छ । यस्तोमा हामीले नेपाली बजारमा १५० सीसी सेग्मेन्टपछि सर्बाधिक विक्री हुने १२५ सीसी सेग्मेन्टमा उपलब्ध ५ ब्रान्डका मोटरसाइकलको माइलेज र मूल्य बारे जानकारी दिएका छौ ।

होन्डा
१२५ सीसी सेग्मेन्टमा सबैभन्दा बढी बिक्ने बाइक हो होन्डा साइन । नेपाली बजारमा यो सिवी साइन र सिवी साइन एसपी गरी कुल २ भेरिएन्टमा उपलब्ध रहँदै आएको छ । १२५ सीसी क्षमताको इन्जिन जडान गरिएको यो बाइकको अधिकतम पावर १०.१६ बीएचपी र टर्क १०.३० एनएम रहेको छ । यो बाइकले प्रतिलिटर पेट्रोलको खपतमा ६५ किलोमिटर माइलेज प्रदान गर्ने दाबी गरिएको छ । ड्रम र डिस्क दुवै भेरिएन्टमा उपलब्ध यो बाइकको मूल्य २ लाख ४३ हजार ९ सय देखि २ लाख ७३ हजार ९ सय रुपैयाँसम्म निर्धारण गरिएको छ ।

हिरो
हिरोसँग यो सेग्मेन्टमा सुपर स्प्लेन्डर र ग्ल्यामर गरी कुल २ मोडलका मोटरसाइकल उपलब्ध छन् । जसमध्ये स्प्लेन्डरको अधिकतम पावर ९ पीएस र टर्क १०.३५ एनएम तथा ग्ल्यामरको पावर ११.५ पीएस र टर्क ११ एनएम रहेको छ । नेपालको तराई भेगमा सर्वाधिक रुचाइएको सुपर स्प्लेन्डरले प्रतिलिटर इन्धनको खपतमा ५५ किलोमिटर माइलेज प्रदान गर्ने दाबी गरिएको छ । त्यसैगरी ग्ल्यामरले पनि ५५ देखि ६० किलोमिटरसम्मको माइलेज दिने दाबी छ । ग्ल्यामर बीएस४ र बीएस६ दुवै भेरिएन्टमा उपलब्ध छ । नेपाली बजारमा सुपर स्प्लेन्डरको मूल्य २ लाख २० हजार रुपैयाँ तोकिएको छ भने ग्ल्यामर बीएस४ को २ लाख ५ हजारदेखि २ लाख ३६ हजार ५ सय रुपैयाँसम्म तथा बीएस६ को २ लाख ७६ हजार रुपैयाँ निर्धारण गरिएको छ ।

बजाज
यो सेग्मेन्टमा बजाजसँग पनि पल्सर र डिस्कभर गरी कुल २ मोडलका मोटरसाइकल उपलब्ध छन् । जसमध्ये पल्सर १२५ ले प्रतिलिटर इन्धनको खपतमा ६० किलोमिटर माइलेज दिने दाबी गरिएको छ भने डिस्कभरले ७० किलोमिटरसम्मको माइलेज दिने दाबी छ । यी मध्ये पल्सर १२५ को पावर ११.८ पीएस र टर्क १०.८ एनएम रहेको छ । यसैगरी डिस्कभरको अधिकतम पावर १३ पीएस र टर्क १०.७९ एनएम रहेको छ । नेपाली बजारमा पल्सर १२५ को मूल्य २ लाख ४६ हजार ९ सय र डिस्कभरको २ लाख ९ सय देखि २ लाख २७ हजार ९ सय रुपैयाँसम्म निर्धारण गरिएको छ ।

यामाहा
१२५ सीसी सेग्मेन्टमा यामाहाले सलुटो मोडलको मोटरसाइकल आयात गरी कारोबार गरिरहेको छ । यो मोटरसाइकलले प्रतिलिटर पेट्रोलको खपतमा ७५ किलोमिटरसम्मको माइलेज प्रदान दिने दाबी गरिएको छ । सलुटोको अधिकतम पावर ८.३ पीएस र टर्क १०.१ एनएम रहेको छ । यो मोटरसाइकलको मूल्य २ लाख ३४ हजार ९ सय रुपैयाँ तोकिएको छ ।

टीभीएस
यो सेग्मेन्टमा टीभीएससँग स्ट्राइकर, म्याक्स र रेडर गरी कुल ३ मोडलका मोटरसाइकल उपलब्ध छन् । जसमध्ये रेडरले ६७ किलोमिटर, म्याक्सले ४० किलोमिटर र स्ट्राइकरले ६५ किलोमिटर माइलेज प्रदान गर्ने दाबी गरिएको छ । पछिल्लो समय चर्चामा रहन सफल रेडरको अधिकतम पावर १२.९ पीएस र टर्क ११.५ एनएम रहेको छ भने म्याक्सको ११.१ पीएस पावर तथा टर्क १०.८ एनएम रहेको छ । यसैगरी स्ट्राइकरको पावर १०.८६ पीएस र टर्क १०.८ एनएम रहेको छ । यी बाइकको मूल्य क्रमशः रेडरको २ लाख ५६ हजार ९ सय, म्याक्सको २ लाख ४१ हजार ९ सय र स्ट्राइकरको २ लाख २१ हजार ९ सय रुपैयाँ निर्धारण गरिएको छ ।