नेपाली बजारमा भोलि यामाहा आर१५एम औपचारिक रुपमा सार्वजनिक गरिने, कति पर्ला मूल्य

काठमाडौं – नेपाली बजारमा भोलि देखि यामाहाको नयाँ मोटरसाइकल आर१५एम औपचारिक रुपमा सार्वजनिक गरिने भएको छ । यामाहाले केही दिन पहिले भृकुटीमण्डपमा सम्पन्न महा एक्सचेन्ज मेलामा यो मोटरसाइकल प्रदर्शन गरेको भए पनि औपचारिक रुपमा भने भोलि मात्र सार्वजनिक गर्ने भएको हो ।

यामाहाको एम सिरिजको मोटरसाइकल आर१५एममा पहिलेकै आर१५ मा भएको १५५ सीसी, सिंगल सिलिन्डर, लिक्विड कुल्ड इन्जिन प्रयोग गरिएको छ, जसले १८.५ बीएचपी पावर र १४.१ एनएम टर्क जेनेरेट गर्छ । यसमा ६ स्पिड गियरबक्स छ भने स्लिपर एन्ड असिस्ट क्लच स्ट्यान्डर्डको रुपमा छ । यसमा ६–स्पिड गियरबक्स दिइएको छ ।

त्यसैगरी यो मोटरसाइकलमा ट्रयाक्सन कन्ट्रोलका साथै क्विक सिफ्टर र स्लिपर क्लचसमेत दिएको छ । यसमा डेल्टाबक्स फ्रेम र आल्मुनियम स्विङ आर्मको प्रयोग गरिएको छ ।

क्विकसिफ्टर यसमा भएको विशेष फिचर हो । यसका कारण निश्चित गति भन्दा बढी चलाउदा गियरसिफ्ट आर्फै हुन्छ र घटाउदा मात्र गियरको प्रयोग गर्नुपर्छ । त्यसैगरी यसमा अपसाइड डाउन टेलिस्कोपिक सस्पेन्सन छ, जसले गर्दा ट्राफिक जाम भएको समयमा चलाउन सहज हुन्छ ।

यो बाइकमा प्रोजेक्टर एलईडी ल्याम्प छ भने एरोडाइनामिक बडीले यसको लुक आकर्षक देखिएको छ । डिजिटल कन्सोल भएको सो बाइकमा स्पोर्ट र स्ट्रिट गरी दुई राइडिङ मोड उपलब्ध छ ।

त्यसैगरी यो बाइकमा साइड स्ट्यान्ड सेन्सर, परिस्कृत रियर फेन्डर आदि विशेषता उपलब्ध छन् ।

मोटरसाइकल सार्वजनिक गरिएसँगै यसको मूल्य पनि औपचारिक रुपमा सार्वजनिक गरिने छ । यसको मूल्य ५ लाख ७४ हजार ९ सय रुपैयाँ हुनेछ ।