२५० सीसी माथिका करिब एक दर्जन ब्रान्डका यी मोटरसाइकल आउने सम्भावना कम

सरकारले लागू गरेकोे आयातमा प्रतिवन्धको सूचीमा २५० सीसी माथिका मोटरसाइकल समेत सामेल भएपछि सो सेग्मेन्टका बाइकको आयात रोकिने भएको छ । यो सेगमेन्टका मोटरसाइकल मात्र आयात गरी कारोबार गर्दै आइरहेका रोयल इन्फिल्ड, जावा र बीएमडब्लुसहित केटीएम, बेनेली, होन्डा, सिएफ मोटो, टीभीएस, बजाज, यामाहा लगायत अन्य केही ब्रान्डका मोटरसाइकल आयात समेत प्रभावित बन्ने देखिएको छ ।

३५० सीसी माथिको मोटरसाइकल मात्र उत्पादन गर्दै आइरहेको रोयल इन्फिल्डसँग हाल नेपाली बजारमा बुलेट इलेक्ट्रा, क्लासिक र मेटियोर गरी कुल ३ वटा मोडल ३५० सीसी क्षमतामा उपलब्ध छन् भने हिमालयन ४११ र इन्टरसेप्टर ६५० सीसी क्षमतामा उपलब्ध रहँदै आएका छन् ।

यसैगरी जावाको क्लासिक र फोर्टी टु २९३ सीसी क्षमताका मोटरसाइकल हुन भने पेराकमा ३३४ सीसी क्षमताको इन्जिन जडान गरिएको छ ।

बीएमडब्लुले बिक्री गर्दै आइरहेको जी ३१० आर र जी ३१० जीएसमा ३१३ सीसी क्षमताको इन्जिन जडान गरिएको छ ।

बिग विङमार्फत उच्च सीसी क्षमताका मोटरसाइकलको बिक्री गर्दै आइरहेको होन्डाको सीआरएफ ३०० एल, ३०० एल र्याली, हाइनेस सीबी ३५०, सीबी ३५० आरएस र सीबीआर ६०० आरआरको आयात रोकिने भएको छ ।

बजाजको डोमिनार ४००, यामाहाको आर३ र टीभीएस अपाचे आरआर ३१० को समेत आयात रोकिने भएको छ । यो नयाँ नियमले केटीएमको ड्युक ३९०, आरसी ३९०, एड्भेन्चर ३९० र ड्युक ७९० को आयात रोकिने छ ।

यसैगरी बेनेलीको टीएनटी ३०२ एस, टीएनटी ६०० आई र टीएनटी ७५२ एसको आयात रोकिने छ भने सीएफ मोटोको ४०० एनके, ६५० एनके, ६५० एमटी, ४०० जीटी र रेसर ५५० इएक्सको समेत आयात रोकिने देखिएको छ ।