अब २६ किलोमिटर भन्दा बढीको माइलेज दिने मारुती सुजुकी अर्टिगा

मारुती सुजुकी अर्टिगा अपडेट सहित लन्च गरिएको छ । यसको प्रारम्भिक मूल्य ८ लाख ३५ हजार भारु राखिएको छ, जबकि टप भेरिएन्ट जेडएक्सआई प्लसको मूल्य १२ लाख ७९ हजार भारु राखिएको छ । मारुती अर्टिगाको टप भेरिएन्टमा सीएनजीको विकल्प पनि दिइनेछ ।

अर्टिगा भारतमा पहिलो पटक सन् २०१२ मा लन्च गरिएको थियो । कम्पनीले हालसम्म अर्टिगाको ७ लाखभन्दा बढी युनिट बिक्री गरिसकेको छ । यस एमपीभीको लागि प्रि–बुकिङ यस महिनाको सुरुमा ११ हजार भारुमा सुरु भएको थियो ।

नयाँ अर्टिगा ४ ट्रिम र ११ ब्रान्ड भेरिएन्टमा उपलब्ध छ । भीएक्सआई, जेडएक्सआई र जेडएक्सआई प्लसमा ३ वटा अटोमेटिक विकल्प दिइएको छ, जबकि सीएनजी विकल्प पनि २ भेरिएन्टमा उपलब्ध छ ।

नयाँ मारुती सुजुकी अर्टिगामा म्यानुअल ट्रान्समिसन सहितको पेट्रोल इन्जिनले २०.५१ किलोमिटर प्रति लिटरको माइलेज प्रदान गर्छ । अटोमेटिक ट्रान्समिसनको साथ २०.३० किलोमिटर प्रति लिटरको माइलेज र सीएनजी मोडलमा २६.११ किलोमिटर प्रति लिटरको माइलेज प्रदान गर्छ । सीएनजी भेरिएन्ट म्यानुअल गियरबक्समा मात्र उपलब्ध छ ।

मारुती सुजुकी अर्टिगामा नयाँ ग्रिल, ७ इन्चको स्मार्टप्ले प्रो टचस्क्रिन इन्फोटेनमेन्ट सिस्टम, अटोमेटिक क्लाइमेट कन्ट्रोल, इन्जिन स्टार्ट–स्टप बटन, हाइट एडजस्टेबल ड्राइभर सिट र सुजुकी कनेक्ट टेलिमेटिक्स जस्ता फिचर समावेश गरिएको छ । सो कार ६ रङमा उपलब्ध छ ।

नयाँ मारुती सुजुकी अर्टिगामा के–सिरिज १.५ लिटर ड्युअल भीभीटी इन्जिन जडान गरिएको छ । यसको पेट्रोल इन्जिनलाई ५ स्पिड म्यानुअल युनिट र नयाँ ६ स्पिड टर्क कन्भर्टर अटोमेटिक युनिटमा जोडिएको छ । अटोमेटिक गियरबक्समा प्याडल सिफ्टर पनि उपलब्ध छ ।