अपडेट भर्सन सहित पावरफुल इन्जिन भएको अल्टो आउँदै

मारुती सुजुकीले यस पटक पनि बिक्रीमा आफ्नो छाप छोडेको छ, त्यसैले कम्पनीले आफ्ना लोकप्रिय मोडलहरूको अपडेट भर्सन लन्च गरिरहेको छ । मारुती सुजुकी इन्डियाले भर्खरै मारुती सेलेरियो, बलेनो, वागनआर र नयाँ मारुती एक्सएल६ का नयाँ मोडलहरू ल्याएको छ ।

मारुती सुजुकीले आफ्नो सबैभन्दा धेरै बिक्री हुने कार अल्टोको फेसलिफ्ट भर्सन लन्च गर्न लागेको छ । मारुती अल्टोको नयाँ भर्सन पुरानो मोडलभन्दा पूर्णतया फरक डिजाइन र फिचर हुने बताइएको छ । नयाँ अल्टोको साइज उचाइ र लम्बाई दुवै बढाइएको छ ।

कम्पनीले नयाँ अल्टो ८०० फेसलिफ्ट ‘हर्टेक्ट’ प्लेटफर्ममा निर्माण गरेको छ, जुन प्लेटफर्ममा बलेनो, नयाँ स्विफ्ट, डिजायर र इग्निस निर्माण गरिएको थियो । आधुनिक प्रविधिसँगै कारलाई बलियो र कम तौलको बनाउनको लागि हर्टेक्ट प्लेटफर्मको विकास गरिएको हो ।

नयाँ अल्टोमा के१०सी इन्जिन दिइएको छ, जसमा ३ सिलिन्डर ड्युअल जेट इन्जिन १.० लिटर इन्जिन रहेको छ । सो इन्जिनले ६७ बीएचपीको पावर र ८९ एनएमको टर्क जेनेरेट गर्छ । यसमा ५ स्पिड म्यानुअल र ५ स्पिड एएमटी गियरबक्स दिने सम्भावना छ । यसमा फ्याक्ट्री फिटेड सीएनजी किटको विकल्प पनि दिइनेछ ।

नयाँ अल्टोको डिजाइन र फिचरमा पनि परिवर्तन गरिएको छ । यसमा नयाँ डिजाइनको आकर्षक क्रोम ग्रिल रहेको छ । कारको ड्यासबोर्डको डिजाइन पनि परिवर्तन गरिएको छ । नयाँ अल्टोमा ९ इन्चको टचस्क्रिन इन्फोटेनमेन्ट सिस्टम दिइएको छ । यसमा पावर विन्डोज, पावर स्टेयरिङ, पुश बटन स्टार्ट–स्टप र अगाडिको सिटमा ड्युअल एयरब्यागसहित एन्टि–लक ब्रेकिङ सिस्टम जस्ता फिचर हुनेछ ।