रोयल इन्फिल्डले बुलेट जत्तिकै बलियो इलेक्ट्रिक बाइक चाँडै नै लन्च गर्ने

रोयल इन्फिल्डले केही समयमै आफ्नो इलेक्ट्रिक बाइक लन्च गर्न लागेको समाचार सार्वजनिक भइरहेका छन् । यद्यपि कम्पनीले यसबारेमा आधिकारिक रुपमा भने केही बताएको छैन ।

अगस्ट २०२० मा रोयल इन्फिल्डका सीईओ विनोद दासारीले कम्पनीले इलेक्ट्रिक बाइक सेगमेन्टमा प्रवेश गर्ने योजना बनाएको पुष्टि गरेका थिए । यस घोषणा पछि उक्त बाइक निर्माता कम्पनीले आफ्नो वार्षिक प्रतिवेदन २०२०–२१ मा कम्पनीले इलेक्ट्रिक बाइक विकास गरिरहेको कुरा पुष्टि गरेको थियो ।

टीभीएस, हिरो, एथर र बीएमडब्ल्यु जस्ता कम्पनीहरूले आगामी महिनामा आफ्ना इलेक्ट्रिक बाइक लन्च गर्ने तयारी गरेका छन् । रोयल इन्फिल्डले पनि यसका लागि तयारी सुरु गरिसकेको छ । रोयल इन्फिल्डका प्रबन्ध निर्देशक सिद्धार्थ लालले भारतीय र विश्वव्यापी बाइक बजारका लागि इलेक्ट्रिक बाइक उत्पादनको लागि गठबंधन गरिएको पुष्टि गरेका छन् ।

रोयल इन्फिल्डले वातावरण, सामाजिक र सरकारी उद्देश्यलाई ध्यानमा राख्दै कम्पनीले विद्युतीकरण प्रक्रियालाई तीव्रता दिएको छ । कम्पनीले रोयल इन्फिल्ड इलेक्ट्रिक बाइकको लागि प्रोटोटाइप तयार गरिसकेको छ र चाँडै नै ईभीको उत्पादन सुरु गर्नेछ । रोयल इन्फिल्डको नयाँ इलेक्ट्रिक बाइक नयाँ इलेक्ट्रिक प्लेटफर्ममा आधारित हुने अपेक्षा गरिएको छ ।

रोयल इन्फिल्डले सन् २०२३ मा आफ्नो इलेक्ट्रिक बाइक उत्पादन सुरु गर्ने घोषणा गर्न सक्छ । रिपोर्टका अनुसार बाइकमा ८ केडब्ल्युएच देखि १० केडब्ल्युएचसम्मको ब्याट्री प्याक प्रयोग गर्ने सम्भावना रहेको छ । सो इलेक्ट्रिक बाइकले लगभग ४० बीएचपी र १०० एनएमको टर्क जेनेरेट गर्ने अपेक्षा गरिएको छ ।