इसुजुले पनि बढायो भारतमा पिकअपको मूल्य, एसयुभीको भने घट्यो

नयाँ बर्षको सुरुवातसंगै भारतमा अहिले सवारीसाधनको मूल्य एकपछि अर्को गरी बढीरहेको छ । यसअघि महिन्द्रा, हुन्डाई, फक्सवागन, स्कोडा र एमजी लगायत ब्रान्डले मूल्य बृद्धि गरिसकेका छन् । मूल्य बृद्धि गर्ने यो सूचीमा पछिल्लो समय इसुजु समेत सामेल भएको छ ।
इसुजुले पिकअपको मूल्य २ लाख ९ हजार भारुसम्म बृद्धि गरेको छ भने एमयू–एक्स एसयुभीको ४x२ भेरियन्टमा १४७२७ भारुले मूल्य बृद्धि गरेको छ ।

त्यसैगरी सोही एसयुभीको ४x४ भेरियन्टमा भने १ लाख ५१ हजार भारुले कम गरिएको छ । जापनीजि अटो मेकर इसुजुले अन्तराष्ट्रिय बजारमा एमयू–एक्सको नयाँ जेनेरेशनलाई बिक्री गर्दै आइरहेपनि भारतीय बजारमा भने पुरानै मोडल बिक्री गरिरहेको छ ।

पछिल्लो सयम निकै नै चर्चामा रहेका डि म्याक्स भी क्रसको जेड प्रेस्टिज ४x४ एटीको मूल्य १ लाख १० हजार र ४ह४ एमटीको २ लाख ९ हजार भारुले बृद्धि गरिएको छ । त्यसैगरी इन्ट्रि लेबल हाई–ल्यान्डर डिजेल म्यानुअलको मूल्य २ लाख ७ हजार भारुले बृद्धि भएको छ । अर्को पिकपअ एसक्यावमा भने पुरानै मूल्यलाई निरन्तरता दिइएको छ ।

भारतमा टोयोटा किर्लोस्करले हाइलक्स पिकअपलाई लन्च गर्ने मिती नजिकिदै गएको समयमा मूल्य बृद्धि गरिँदा यसले इसुजु पिकअपको बिस्तार हुँदै गरेको बजारमा धक्का पुग्ने आंकलनहरु गरिएका छन् ।

भारतमा मूल्य बढेपछि यसको सिधा असर नेपाली बजारमा समेत पर्ने अनुमान लगाइएको छ । हाल नेपाली बजारमा डि म्याक्स भी क्रस म्यानुअलको मूल्य ८९ लाख ९० हजार रुपैयाँसम्म निर्धारण गरिएको छ भने हाई–ल्यान्डर म्यानुअलको ५७ लाख ९० हजार रुपैँया पर्छ । त्यसैगरी एमयू–एक्स एसयुभीको मूल्य १ करोड ४९ लाख ९० हजार रुपैयाँ निर्धारण गरिएको छ । भारतमा बृद्धि गरिएको मूल्यलाई आधार मान्दा भोलिका दिनमा नेपालमा यसको एउटै पिकअपमा ८ लाख माथीसम्म मूल्य बृद्धि हुने देखिएको छ ।