क्रसफायरले शुरु गर्यो ट्रेकर २५० अपडेटेड भर्सनको डेलिभरी, नयाँ बुकिङ लिनेलाई हेल्मेट र ५ हजार नगद छुट

क्रसफायर मोटरसाइकलको नेपालका लागि आधिकारिक बितरक क्लासिक ह्विल्स एक्स्पोर्ट एन्ड इम्पोर्ट प्रालिले नयाँ बाइक ट्रेकर २५० अपडेटेड भर्सन यसअघि बुकिङ लिएर बसेका ग्राहकलाई बितरण गर्न शुरुवात गरेको छ । ३ महिनाअघि नेपाली बजारमा भित्रिएको ट्रेकरलाई कम्पनीले हालसालैमात्र अपडेट गरेर बजारमा सार्बजनिक गरेको थियो ।

२५० सीसी सेग्मेन्टमा सबैभन्दा सस्तो बाइकका रुपमा सार्बजनिक गरिएको यो बाइकको मूल्य सुरुवाती समयमा ३ लाख ४८ हजार रुपैयाँ तोकिएको थियो । पछि अपडेट गरेर ल्याइएको नयाँ बाइकको मूल्य भने ३ लाख ७५ हजार रुपैयाँ निर्धारण गरिएको छ ।

यसअघि बुकिङ लिएका ग्राहकलाई डेलिभरी संगसंगै नयाँ बुकिङ समेत खुल्ला गरिएको कम्पनी स्रोतले बताएको छ । यसै महिनाको १२ गतेसम्म बुकिङ लिने ग्राहकलाई एउटा आकर्षक हेल्मेट निशुल्क प्रदान गरिनुको साथै ५ हजार रुपैयाँ नगद छुट समेत प्रदान गरिने बताइएको छ ।

यस्तो छ नयाँ अपडेटेड भर्सन
नयाँ ट्रेकरको ग्राफिक्स र फिचर्समा परिबर्तन गरिएको छ । साथै यसको पावर तथा पर्फमेन्समा समेत सुधार गरिएको छ । नयाँ बाइकले पहिलेको तुलनामा बढी माइलेज प्रदान गर्ने समेत बताइएको छ । उत्कृष्ट ह्यान्डलिङका कारण यो बाइकमा यात्रा गर्दा रमाइलो महशुस हुनेछ ।

यो नयाँ बाइकमा युएसबी चाजिर्ङ पोर्ट, डिजिटल इन्स्ट्रुमेनट कन्सोल, गियर इन्डिकेटर थप गरिएको छ । यसअघिको मोडलमा ५ स्पीडको गियरबक्स दिइएकोमा नयाँ बाइकमा यसलाई बढाएर ६ स्पिड पुर्याइएको छ । जसका कारण पहिलेको तुलनमा राम्रो पर्फमेन्स दिने दाबी गरिएको छ ।