टु ह्विलरमा चिनियाँ पार्ट्स भित्र्याउँदै सत्यदिप, ब्याट्रीपछि भित्र्यायो एएक्सटीजी बेरिङ

स्पेयर पार्ट्स व्यवसायमा स्थापित सत्यदिप इन्टरनेसनलले पछिल्लो समय चीनबाट समेत मोटरसाइकल र स्कुटरमा प्रयोग हुन पार्ट्स भित्र्याउन थालेको छ । भारतीय बजारमा उत्पादन हुने बहुराष्ट्रिय ब्रान्डको कारोबार गर्दै आइरहेको यो कम्पनीले बजारमा चिनियाँ पार्ट्सको माग बढ्न थालेपछि यसको कारोबारमा ध्यान दिन थालेको हो ।

भारतीय पार्ट्सको तुलनामा मूल्य केही कम हुने हुँदा बजारमा यस्ता पार्ट्सको माग बढ्दै गएको कम्पनीका प्रबन्ध निर्देशक दिपेन्द्र मिश्रले बताए । पहिलो चरणमा चीनबाट ब्याट्री आयात गरी कारोबार थालेको बताउँदै उनले भने, ‘हामीले भित्र्याएको केज ब्रान्डको ब्याट्रीले अहिले बजारमा राम्रो प्रतिक्रिया पाइरहेको छ । मूल्य केही कम भएपनि गुणस्तरमा सम्झौता नगरिएका कारण यो ब्याट्री ग्राहकको रोजाइमा पर्न थालिसकेको छ ।’

ब्याट्रीको कारोबारबाट उत्साहित यो कम्पनीले पछिल्लो समय चीनमा निर्मित एएक्सटीजी ब्रान्डको बेरिङ समेत भित्र्याएको छ । नेपाली बजारमा उपलब्ध प्रायः सबैजसो टु ह्विलरमा प्रयोग गर्न सकिने यो बेरिङ बलियो, टिकाउ र मजबुत रहेको मिश्रले दाबी गरे । उनले भने, ‘बजारमा चीनबाट विभिन्न थरिका स्पेयर पार्ट्स आयात हुन्छन् । यस्तोमा हामीले गुणस्तरलाई बढी जोड दिएका छौ । चीनबाट आयात हुने अन्य पार्ट्सको तुलनामा हाम्रो पार्ट्सको मूल्य केही बढी भए पनि गुणस्तरमा शंका गर्नुपर्दैन । ’

मुलतः भारतीय ब्रान्डको स्पेयर पार्ट्समा केन्द्रित भई कारोबार गर्दै आइरहेको यो कम्पनीले भोलिका दिनमा चीनबाट थप प्रकारका स्पेयर पार्ट्स समेत मगाउँदै जाने योजना बनाएको छ । इन्जिनसँग सरोकार राख्ने संवेदनशील पार्ट्स बाहेक मोटरसाइकल र स्कुटरको रनिङ आइटमको आयात चीनबाट गर्दै जाने आफूहरुको योजना रहेको मिश्रले बताए ।

क्लच प्लेट, मिरर, स्पार्क प्लग, डिस्क प्याड लगायत अन्य प्रकारका स्पेयर पार्ट्स नेपाल भित्रिने क्रममा रहेको उनले जानकारी गराए ।