अटोमोबाइल कम्पनीमा सीईओे राख्ने ट्रेन्ड बढ्दो, यी हुन् हालका चर्चित सीईओे

नेपालमा प्रायः बैंक तथा वित्तीय संस्थाहरुमा मात्र सीईओे अर्थात प्रमुख कार्यकारी अधिकृत राख्ने प्रचलन कायम रहे पनि पछिल्लो समय अटोमोबाइल आयातकर्ता कम्पनीहरुले समेत सीईओे राख्न थालेका छन् । कुनैपनि संस्थाको व्यवस्थापन र कार्य सञ्चालन हेर्ने सबैभन्दा ठुलो पदका रुपमा सीईओेलाई लिने गरिन्छ । कम्पनीको सञ्चालक समितले योग्य र क्षमतावान व्यक्तिलाई यो पदमा नियु्क्त गर्ने प्रचलन छ ।

टाटा गाडीको आधिकारिक वितरक सिप्रदी ट्रेडिङबाट सुरुवात भएको सीईओे राख्ने प्रचलनलाई अहिले नेपालका आधा दर्जन बढी अटोमोबाइल कम्पनीले सिको गरेका छन् । हाल सिप्रदी सहित एमएडब्लु इन्टरप्राइजेज, पूजा इन्टरनेसनल, आइएमई मोटर्स, दिगो नेपाल, बालाजु अटो वर्क्स र इस्टर्न एजेन्सिज लगायत अन्य केही कम्पनीले समेत सीईओे राखेका छन् भने अझै पनि अधिकांश यस्ता ठूला कम्पनीहरुले महाप्रबन्धक र भाइस प्रेसिडेन्टमार्फत कम्पनीको व्यवस्थापन सम्हाल्दै आइरहेका छन् ।

सिप्रदी ट्रेडिङमा हाल राजन बाबु श्रेष्ठ सीईओे छन् । टोयोटा गाडीको आधिकारिक वितरक युनाइटेड ट्रेडर्स सिन्डिकेटबाट अटोमोबाइल क्षेत्रमा करियर सुरुवात गरेका श्रेष्ठले सिप्रदीमा लामो समय बिताइसकेका छन् । सीईओे हुनुअघि उनी सिप्रदीमा भाइस प्रेसिडेन्ट र सिओओ अर्थात चिफ अपरेटिङ अफिसर पदमा कार्यरत थिए ।

यामाहा मोटरसाइकलको आधिकारिक वितरक एमएडब्लु इन्टरप्राइजेजमा हाल राजु क्षेत्री सीईओे छन् । बजाज मोटरसाइकलबाट यो क्षेत्रमा उदाएका उनी टु ह्विलर क्षेत्रका एक कुशल कार्यकारी मानिन्छन् । बजाज छाडेपछि सुजुकी र महिन्द्रा टु ह्विलरमा समेत आबद्ध भएका उनी एमएडब्लु इन्टरप्राइजेजमा हालसालै सीईओे भएका हुन् ।

फक्सवागन गाडीको आधिकारिक बितरक पूजा इन्टरनेसनलले विवेक बिजुक्छेलाई सीईओेको जिम्मेवारी प्रदान गरेको छ । फक्सवागन गाडी नेपाल भित्र्याउन समेत महत्वपूर्ण भूमिका खेलेका उनले पूजा इन्टरनेसनलमा सुरुवाती समयदेखि नै उच्च तहमा बसेर व्यवस्थापन हेर्दै आइरहेका थिए । सीईओे बन्नुअघि उनी कम्पनीमा भाइस प्रेसिडेन्ट थिए ।

अशोक लेल्यान्डको आधिकारिक वितरक आइएमई मोटर्समा हाल हेमन्त पुरानिक सीईओे छन् । पुरानिकले यसअघि लामो समयसम्म टाटा मोटर्सको नेपालमा लागि कन्ट्री म्यानेजरका रुपमा भूमिका निर्वाह गरेका थिए । टाटा छाडेर इलेक्ट्रिक भेइकल दीगोमा सीईओे बनेको उनी हाल आइएमई मोटर्समा सीईओे नियुक्त भएका हुन् ।

अग्नि ग्रुप अन्तर्गतको बालाजु अटो वर्क्समा शशिन्द्र भन्डारीले सिईओको भूमिका निर्वाह गर्दै आइरहेका छन् । बालाजु अटो वर्क्समा आउनुअघि उनी फक्सवागन गाडीको सर्भिस हेड अर्थात पूजा इन्टरनेसनलमा महाप्रबन्धक थिए । बालाजु अटो वर्क्सले महिन्द्रा प्यासेन्जर कारको मर्मत सम्भार तथा सर्भिस नेटवर्क विस्तार सम्बन्धी कार्य गर्दै आइरहेको छ ।

त्यसैगरी आइसर गाडीको आधिकारिक बितरक इस्टर्न एजेन्सिजमा सुनिल थापा सीईओे छन् । अटोमोबाइल क्षेत्रका अनुभवी र कुशल व्यवस्थापकको पहिचान बनाएका उनले यसअघि लामो समयसम्म सिप्रदी ट्रेडिङको उच्च व्यवस्थापकिय जिम्मेवारी निर्वाह गरेका थिए ।

आइसर गाडीबाट यो क्षेत्रमा करियर सुरुवात गरेका दीपक थापा हालसालै दीगो नेपालमा सीईओे नियुक्त भएका छन् । दीगो नेपाल अर्थात दीगो ग्रुप अफ कम्पनिजले चीनबाट दीगो ब्रान्डका इलेक्ट्रिक कार आयात गरी कारोबार गर्दै आइरहेको छ । दीगोमा आउनुअघि उनी लक्ष्मी ग्रुप अन्तर्गतको एसएमएल इसुजुको बिजनेस हेड थिए ।