यस्तो देखिने छ हिरोको इलेक्ट्रिक स्कुटर, १०औं वार्षिकोत्सवको अवसरमा सार्वजनिक

हिरो मोटोकर्पले अब आउने इलेक्ट्रिक स्कुटरको पहिलो झलक सार्वजनिक गरेको छ । कम्पनीले चाँडै नै पहिलो इलेक्ट्रिक मोडल लन्च गर्ने तयारी गरिरहेको छ । हिरो मोटोकर्पका चेयरम्यान पवन मुन्जालले हिरो मोटोकर्पको १०औं वार्षिकोत्सवको अवसरमा नयाँ इलेक्ट्रिक स्कुटरको झलक सार्वजनिक गरेका हुन् । यद्यपि नयाँ स्कुटरको वारेमा पुरै जानकारी भने सार्वजनिक गरिएको छैन ।

हिरो मोटोकर्पको इलेक्ट्रिक सेगमेन्टमा यो पहिलो कदम हुनेछ । ईभी क्षेत्रमा बजाज अटो र टीभीएस जस्तो टु ह्वील कम्पनीको पहिला नै इलेक्ट्रिक स्कुटर उपलब्ध रहेको छ । हिरो मोटोकर्पको भने यो पहिलो इलेक्ट्रिक स्कुटर हुनेछ । जसको प्रतिस्पर्धा ओला, बजाज र टीभीएससँग हुनेछ ।

टिजरमा देखिएको इलेक्ट्रिक स्कुटरको डिजाइन निकै स्लिक देखिएको छ । यसमा सेतो र कालो रङ, फ्लाईस्क्रिन र लामो सिटको संयोजनको साथमा घुमाउरो वडी डिजाइन गरिएको छ । सो इलेक्ट्रिक स्कुटरमा फ्रन्टमा १२ इन्च र रियरमा १० इन्चको टायर जडान गरिएको छ ।

यही वर्ष अप्रिलमा हिरो मोटोकर्पले ताइवानको कम्पनी गोगोरोसँग ब्याट्री प्याक र टेक्निकल सुविधाको लागि सम्झौता गरेको थियो । नयाँ इलेक्ट्रिक स्कुटरको डिजाइन गोगोरोको इलेक्ट्रिक स्कुटर जस्तो भने देखिने छैन । तर केही एलिमेन्ट्स जस्तै सिंगल साइडेड स्विंगआर्म बजाज चेतक जस्तो देखिनेछ ।

लन्चिङ पछि हिरोको नयाँ इलेक्ट्रिक स्कुटरको ओला इलेक्ट्रिक स्कुटर, बजाज चेतक इलेक्ट्रिक, एथर ४५०एक्स टीभीएस आईक्युबसँग प्रतिस्पर्धा हुनेछ । हिरो मोटोकर्पको इलेक्ट्रिक स्कुटर यही वर्षको अन्तमा बिक्रीको लागि तयार हुनेछ ।