फेरि नेपाल आउने भयो चाइनिज ब्रान्ड चेरी, सारदा ग्रुप बन्यो आधिकारिक वितरक

काठमाडौं – कुनै समयमा नेपाली बजारमा भित्रिएर बन्द भएको चाइनिज ब्रान्ड चेरी फेरि नेपाली बजारमा उपलब्ध हुने भएको छ । विश्व चर्चित चेरी ब्रान्डले नेपाली बजारको लागि आधिकारिक वितरकको रुपमा शारदा ग्रुप अन्तर्गतको एसपीजी अटोमोबाइल्स प्रालिलाई नियुक्त गरेको छ ।

कम्पनी स्रोतका अनुसार चेरी ब्रान्डको गाडी नेपालमा चाँडै नै बिक्रीका लागि उपलब्ध हुनेछ । नेपालमा दीर्घकालीन व्यापार रणनीतिको अनुशरण गर्दै चेरी इन्टरनेसनलले नयाँ उत्पादनको माध्यमबाट प्रतिस्पर्धात्मक वातावरण सिर्जना गर्न र बजारको मागलाई सम्बोधन गर्न मद्दत गर्ने कम्पनीको भनाइ छ ।

सन् १९९७ जनवरी ८ मा स्थापना भएको चेरी ब्रान्ड अटोमोबाइल्स कम्पनी लिमिटेडको उत्पादन लाइनबाट पहिलो कारले सन् १९९९ डिसेम्बर १८ मा बजार प्रवेश गरेको हो । हाल चेरी ब्रान्डको वार्षिक ९ लाख कार, इन्जिन र ४ लाख ट्रान्समिसन उत्पादन क्षमता रहेको छ । चेरी ब्रान्डले प्यासेन्जर र कमर्सियल सवारीसाधनको अतिरिक्त मिनी भ्यान पनि उत्पादन गर्दछ । चेरी ब्रान्डका एसेम्बल र पार्टपूर्जा उत्पादन गर्ने प्लान्ट चीन लगायत विश्वका १५ देशमा फैलिएको छ ।

हाल विश्व बजारमा चेरी ब्रान्डका २० भन्दा बढी मोडलहरु बिक्री भैरहेका छन् भने कम्पनीले सुरक्षा, ऊर्जा बचत र वातावरण–अनुकूलतालाई ध्यानमा राखि भविष्यमा दर्जन भन्दा बढी मोडलहरु सार्वजनिक गर्ने योजना बनाएको छ । चेरीले क्रमिक रूपमा आईएसओ ९००१ र जर्मन टीयूभी रेनल्यान्ड आईएसओ टीएस१६९४९ आदिको गुणस्तर प्रमाणपत्र प्राप्त गरेको छ । यसका साथ्साथै कम्पनीले लगातार पाँच वर्षसम्म चीनमा ‘सर्वश्रेष्ठ विदेशी छवि उद्यम’ को सम्मानित उपाधि र उपकरण विनिर्माण उद्योगमा पहिलो स्थान हासिल गरको छ ।

चेरीले आफ्नो स्थापनादेखि विश्वव्यापीकरण रणनीति लागू गरेको छ र चीनको पहिलो प्यासेन्जर कार कम्पनी बनेको छ । हालसम्म, चेरीले ८० भन्दा बढी देश र क्षेत्रहरूमा निर्यात गरेको छ ।

नेपाली बजारमा करिब १० वर्ष पहिले सम्म चेरी ब्रान्डका टिग्गो, क्युक्यु३ लगायतका गाडी बिक्री–वितरण हुन्थे । बतास अर्गनाइजेसन अन्तर्गतको बामा मोटर्सको यसको आधिकारिक वितरक थियो । उपयुक्त रुपमा पार्ट्स तथा सर्भिसिङ उपलब्ध गराउन नसके पछि यसको बिक्री बन्द हुन पुगेको थियो ।

नेपाली बजारमा सारदा ग्रुप अन्तर्गतको पायोनियर मोटोकर्पले निसान र ड्याटसन गाडी बिक्री–वितरण गरिरहेको छ । अब यही ग्रुप अन्तर्गतको एसपीजी अटोमोबाइल्स आधिकारिक वितरक बने पश्चात चेरी ब्रान्डले नेपाली बजारमा सुखद पुनरागमन गर्ने अपेक्षा गर्न सकिन्छ ।