यामाहा एसजेड–आरआरः १५० सीसी क्षमताको सबैभन्दा सस्तो बाइक

नेपाली टु ह्विलर बजारमा १५० सीसी क्षमताका बाइक सर्बाधिक बिक्री हुने सेग्मेन्टमा पर्छ । हाल यो सेग्मेन्टमा बजाज, यामाहा, होन्डा र हिरोलगायत ब्रान्डका बाइक उपलब्ध छन् । यो सेग्मेन्टमा १५० देखि १६० सीसी क्षमतासम्मका बाइकलाई समेत समावेश गर्ने गरेको पाइन्छ । यद्यपि १५० माथि कट्ने बित्तिकै मूल्यमा ठूलो अन्तर पर्ने कारण यहाँ हामीले १५० सीसी क्षमताका ४ ब्रान्डबारे चर्चा गर्न गैरहेका छौ ।

यो सेग्मेन्टमा बजाजको पल्सर टीडी र एसडी, हिरोको हंक र होन्डाको सीबी युनिकर्न उपलब्ध रहँदै आएको छ । त्यसैगरी यामाहाको ५ वटा मोडल १५० सीसी क्षमतामा उपलब्ध छन् । यसको एसजेड–आरआर, एफजी १६, एफजी भी३, एफजीएस र एफजीएस भी३ १५० सीसी क्षमतामा उपलब्ध छन् । जसमध्ये एसजेड–आरआर यो सेग्मेन्टकै सस्तो र एफजीएस भी३ सर्बाधिक महंगो बाइकका रुपमा परिचित छन् । जसको मूल्य क्रमश २ लाख ४६ हजार ९ सय र ३ लाख ३४ हजार ९ सय रुपैयाँ पर्छ ।

यो सेग्मेन्टमा सर्बाधिक बिक्री हुने पल्सर एसडीको मूल्य २ लाख ६८ हजार ९ सय र टीडी मोडलको २ लाख ८३ हजार ९ सय कायम गरिएको छ । हिरो हंकको मूल्य २ लाख ८२ हजार ५ सय र होन्डा युनिकर्नको २ लाख ६९ हजार ९ सय रुपैयाँ निर्धारण गरिएको छ ।

यस्तो छ एसजेड–आरआरमा उपलब्ध पावर, फिचर्स तथा पर्फमेन्स
एसजेड–आरआर भर्सन २.० यामाहा मोटर्सको कम्युटर सेग्मेन्ट अन्तर्गतको पावरफुल र स्टाइलिस बाइक हो । यसमा यामाहाको ब्लुकोर टेक्नोलोजी प्रयोग गरिएको छ । यो मोटरसाइकलमा २ भल्व, सिंगल सिलिन्डरयुक्त कार्बुरेटर इन्जिन जडान गरिएको छ ।

यो मोटरसाइकलले यसअघिको मोडलको तुलनामा ११ प्रतिशत भन्दा बढी माइलेज दिने दाबी गरिएको छ । यसको अधिकतम पावर १२.१ पिएस र टर्क १२.८ एनएम रहेको छ । यो बाइकले प्रतिलिटर इन्धन खपतमा ५० किलोमिटर माइलेज दिने दाबी गरिएको छ ।

बाइकको अगाडि चक्कामा हाइड्रोलिक डिस्क र पछाडि ड्रम बे्रक र दुबै चक्कामा ट्युबलेस टायर जडान गरिएको छ । टेलिस्कोपिक फ्रन्ट सस्पेन्सनका कारण बाइकमा यात्रा गर्दा थकानको महशुस गर्नुपर्दैन । १६५ एमएम ग्राउन्ड क्लियरेन्स भएको यो बाइकमा १४ लिटर फ्युल अट्ने ट्यांक जडान गरिएको छ ।