नयाँ फिचर र कलर स्किमका साथ हाइब्रिड भर्सनमा आयो यामाहा फेसिनो १२५ एफआई स्कुटर

यामाहाले फेसिनो १२५ एफआई स्कुटरलाई हाइब्रिड भर्सनमा सार्वजनिक गरेको छ । नयाँ अपडेट गरिएको स्कुटरमा नयाँ एक्सटेरियर लुक दिइएको छ । त्यसैगरी यसमा नयाँ फ्रेस कलर स्किम छ ।

डिस्क र ड्रम दुवै भेरिएन्टमा उपलब्ध फेसिनो १२५ एफआई हाइब्रिडमा बीएस६ मापदण्डयुक्त एयरकुल्ड, फ्युल इन्जेक्टेड, १२५ सीसीको ब्लुकोर इन्जिन दिइएको छ, जसले ८.२ पीएस पावर र १०.३ एनएम टर्क जेनेरेट गर्छ ।

यो स्कुटरमा एक स्मार्ट मोटर जेनेरेटर (एसएमजी) सिस्टम दिइएको छ, जसले हाइब्रिड सिस्टमलाई अपनाउछ । यसमा भएको एसएमजी सिस्टमले स्कुटर स्टार्ट गर्ने समयमा हुने इलेक्ट्रिक मोटरको जस्तै काम गर्छ, जसले दुई जना राइडर बसेको वा उकालो चढिरहेको समयमा समेत स्कुटर लड्खडाउन दिदैन र सुरक्षा प्रदान गर्छ ।

इन्जिन संचालन गरेको करिव ३ सेकेन्ड पश्चात वा थ्रोटल कट ब्याक पश्चात वा इन्जिनको आरपीएम तय सीमा भन्दा माथि गए पश्चात पावर असिस्ट वा हाइब्रिड सिस्टम रोकिन्छ । इन्स्ट्रयुमेन्ट क्लस्टरमा एक इन्डिकेटर लाइटमार्फत राइडरले उक्त हाइब्रिड सिस्टमले काम गरिरहेको पनि देख्न सक्छन् । यसमा भएको साइलेन्ट स्टार्टरले इन्जिनलाई आवाज बिनै स्टार्ट हुन सहयोग गर्छ ।

यो स्कुटरको डिस्क ब्रेक भेरिएन्टमा एड्भान्स्ड एलईडी हेडलाइट, डीआरएल र एलईडी टेललाइट उपलब्ध छ । त्यसैगरी युनिफाइड ब्रेक सिस्टम अर्थात यूबीएसका साथ १९० एमएमको डिस्क ब्रेक उपलब्ध छ ।

यामाहा मोटरसाइकल कनेक्ट एपको सहयोगले ब्लुटुथ कनेक्ट गर्न सकिन्छ । यसबाट आन्सर ब्याक, लोकेट माई भेइकल, राइडिङ हिस्ट्री, पार्किङ रेकर्ड र हजार्ड जस्ता विभिन्न फिचरको प्रयोग गर्न सकिन्छ ।

यो स्कुटरको मूल्य अहिले सार्वजनिक गरिएको छैन । नेपाली बजारमा हाल उपलब्ध यामाहा फेसिनो १२५ एफआईको मूल्य २ लाख ५६ हजार ९ सय रुपैयाँ छ । नेपाली बजारमा यो स्कुटर केही समय पछि आउन सक्छ र मूल्य पनि हालको मोडल भन्दा केही बढी हुन सक्छ ।