यामाहा एफजेड–एक्स बाइकको खुल्यो अनौपचारिक बुकिङ, जुन १८ मा लन्च हुँदै

जापानी टु ह्विलर निर्माता कम्पनी यामाहाले चाँडै नै भारतीय बजारमा नयाँ स्पोर्ट्स बाइक लन्च गर्ने तयारी अवस्थामा छ । आकर्षक लुक र शानदार फिचर सहित कम्पनीले सो बाइक १८ जुनमा लन्च गर्ने भएको छ । केही हप्ता पहिला भारतको अटल टनलको नजिक टिभी कमर्सियल शुटको समयमा सो नयाँ मोडल देखा परेको थियो । नियो रेट्रो स्टाइल भएको सो बाइक निकै आकर्षक डिजाइन र लुकमा उपलब्ध रहेको छ ।

भारतीय बजारमा यसको अनौपचारिक बुकिङ प्रारम्भ भइसकेको छ । डिलरहरुले बुकिङ लिन थालेका छन् ।

यद्यपि कम्पनीले सो बाइकको बारेमा आधिकारिक जानकारी दिएको छैन । कम्पनीले यसको ट्यागलाइनको बारेमा मात्र जानकारी दिएको थियो । यसको ट्यागलाइन राइड फ्रि रहेको छ । मिडिया रिपोर्टका अनुसार आगामी १८ जुनमा भारतीय बजारमा एफजेड–एक्स स्पोर्ट्स बाइक लन्च गरिने भएको छ । सो बाइक परीक्षणको समयमा धेरै पटक देखिएको थियो ।

बाइकको स्पाई फोटो अनुसार सो बाइकमा एलईडी प्रोजेक्टर हेडल्याम्प समावेश गरिएको छ । यो भन्दा पहिलो एमटी–१५ बाइकमा देखिएको थियो । यसमा सर्कूलर स्प्लिट एलईडी डे टाइम रनिङ लाइटको साथमा पिलियन राइडरको लागि ग्र्याब रेल समावेश गरिएको छ ।

सो बाइकमा १४९ सीसी एफजेडएस–एफआई प्लेटफर्मको प्रयोग गरिएको छ । बाइकमा १४९ सीसी सिंगल सिलिन्डर एयर कुल्ड इन्जिन समावेश गरिएको छ । सो इन्जिनले ७२५० आरपीएममा १२.४ बीएचपीको पावर जेनेरेट गर्छ । इन्जिनको साथमा ५ स्पिड ट्रान्समिसनको विकल्प रहेको छ ।

यामाहाको सो नयाँ बाइकको लम्बाई २०२० एमएम, चौडाई ७८५ एमएम, उचाई १११५ एमएम रहेको छ । नयाँ बाइक हाल उपलब्ध मोडलको तुलनामा लम्बाई ३० एमएम, उचाई ५ एमएम र चौडाई ३५ एमएम बढी रहेको छ । सो बाइकको ह्विलवेस १३३० एमएम रहेको छ ।

सो बाइकमा स्मार्टफोन ब्लुटुथ कनेक्टिभिटीको साथमा शानदार र आधुनिक फिचर उपलब्ध रहेको छ । पुरानो मोडलको तुलनामा यो बाइक करिब ५ हजार देखि ७ हजार भारु महँगो हुने सम्भावना रहेको छ । रिपोर्टका अनुसार नयाँ मोडलको मूल्य १ लाख ८ हजार भारु हुने सम्भावना छ ।