एमजी जेडएस ईभीको मूल्य अब ५० लाख ९९ हजार, पहिले भन्दा ९ लाख रुपैयाँ कम

काठमाडौं – नेपाली बजारमा एमजी ब्रान्डका गाडी बिक्री–वितरण गरिरहेको पारामाउन्ट मोटर्सले इलेक्ट्रिक गाडी एमजी जेडएसको नयाँ मूल्य सार्वजनिक गरेको छ । नयाँ मूल्य सूची अनुसार एमजी ईजेडएसको मूल्य ५० लाख ९९ हजार रुपैयाँ हुनेछ ।

गत वर्षको बजेट सार्वजनिक भए पश्चात यो गाडीको मूल्य ५९ लाख ९९ हजार रुपैयाँ तोकिएको थियो । यो भन्दा पहिले यसको मूल्य ४९ लाख ९९ हजार रुपैयाँ थियो । सरकारले एकै पटक धेरै कर बढाएका कारण इलेक्ट्रिक गाडीप्रति नेपालीहरुको मोहभंग हुन पुगेको थियो ।

केही दिन पहिले सरकारले सार्वजनिक गरेको आगामी आर्थिक वर्षको बजेट वक्तव्यमार्फत अन्तःशुल्कमा पुरै छुट र भन्सार दरमा व्यापक कतौती गरिए पश्चात अटोमोबाइल कम्पनीहरुले धमाधम नयाँ मूल्य सूची सार्वजनिक गर्न थालेका हुन् ।

पहिले १५० वाट सम्मको मोटर भएको इलेक्ट्रिक कारमा १० प्रतिशत भन्सार शुल्क भएकोमा हाल १५ प्रतिशत तोकिएको छ । यसले गर्दा गत वर्ष सार्वजनिक गरिएको बजेट भन्दा थप १ लाख रुपैयाँ महंगो पर्न गएको कम्पनीको भनाइ छ ।

विद्युतीय एसयूभी एमजी जेडएसले ११० किलोवाट पावर र ३५० एनएम अधिकतम टर्क दिन्छ र यसमा भएको लिथियम आयोन ब्याट्री ३० मिनेटमा ८० प्रतिशतसम्म चार्ज हुन्छ । एमजी जेडएस ईभीलाई एक पटक चार्ज गरेपछि ४२८ किमीसम्मको माइलेज दिन्छ र यसको ब्याट्री लाइफमा ८ वर्ष अथवा १ लाख ५० हजार किलोमिटर वारेन्टी रहेको छ ।

पारामाउन्ट मोटर्सका अनुसार अब २०२१ मोडलका एमजी ईजेडएस गाडी बिक्रीका लागि उपलब्ध हुने छन् । आज देखि बुकिङ गर्ने ग्राहकलाई नयाँ मूल्य अनुसारको गाडी उपलब्ध गराइने छ ।