यामाहाले ल्याउँदै छ आर सिरिजको नयाँ मोटरसाइकल, आर७ हुने सम्भावना

यामाहाले हालै इन्जिन नोट सहितको एउटा सानो भिडियो सार्वजनिक गरेको छ, जसले कुनै आर फेमिलीको बाइक बजारमा आउने संकेत गरेको छ । २८ सेकेन्डको सो युट्युब टिजरका आधारमा यामाहाले एमटी–०७ प्यारालल ट्विन इन्जिनयुक्त फुल्ली फेयर्ड मोटरसाइकल आउँदै छ भन्ने अनुमान लगाउन सकिन्छ ।

के यामाहाले वाईजेडएफ–आर७ बाइक ल्याउदै छ त ? अनुमान यही गरिएको छ । भिडियोमा देखिएको टाइटल ट्रयाक, स्ट्रिट, पहाडी दृश्य र अन्तिममा लेखिएको ‘आर वर्ल्ड र कमिङ सुन’ का आधारमा यामाहाले अब आर सिरिजको नयाँ मोटरसाइकल ल्याउँदै भन्ने अनुमान गरिएको छ

गत फेब्रुअरीमै यामाहाले मिडिलवेट सुपरस्पोर्ट बाइक ल्याउँदै छ र यसले आर३ र आर१ बीचको ग्यापलाई पुरा गर्नेछ भनिएको थियो । यसका आधारमा अब यो मोटरसाइकलको नाम आर७ हुन सक्छ भनिएको छ ।

मोटरसाइकलमा एमटी–०७ को इन्जिन प्रयोग गरिने छ, जसले ७४ एचपी पावर दिन्छ । यद्यपि यसमा केही अपडेट पनि हुन सक्ने छ । यसमा फरक प्रकारको सस्पेन्सन सेटअप र ब्रेक प्रयोग हुने अनुमान गर्न सकिन्छ ।