६ महिनामा नेपाल भित्रिए ५,१०७ विद्युतीय कार

काठमाडौं – चालु आर्थिक वर्षको ६ महिना अर्थात पुस मसान्त सम्म नेपालमा ५ हजार १०७ विद्युतीय कार, जिप र भ्यान भित्रिएका छन् ।

भन्सार विभागले प्रकाशित गरेको तथ्यांक अनुसार यो अवधिमा ५० किलोवाट सम्मका २ हजार ५६, ५० देखि १०० किलोवाट सम्मका २ हजार ९७०, १०० देखि २०० किलोवाट सम्मका ६८ र २०१ देखि ३०० किलोवाट सम्मका १३ इलेक्ट्रिक कार, जिप र भ्यान भित्रिएका हुन् ।

यस अनुसार पुस महिनामा मात्र सबैगरी १ हजार ४२१ विद्युतीय कार, जिप र भ्यान भित्रिएका छन् । यो भन्दा पहिले मंसिर महिनामा ८९९ युनिट विद्युतीय कार, जिप र भ्यान आयात भएका थिए ।

यो अवधिमा धेरै सवारी साधन नेपाली बजारमा भित्र्याउनेमा बीवाईडी र टाटा नै अगाडि रहेका छन् । त्यसैगरी एमजी, सेरेस, किया, हुन्डाई आदि ब्रान्ड यस पछि रहेका छन् ।

विद्युतीय कारको कर बढ्ने हल्ला चलेको कारण माघमा धेरै कार भित्रिएको अनुमान गर्न सकिन्छ । पछिल्लो समयमा सरकारले कम क्षमताको मोटर भएका विद्युतीय कारको कर नबढाएसँगै यस्ता सवारी साधनमा आकर्षण बढेको थियो । त्यसैले गर्दा नै १०० किलोवाट सम्मका विद्युतीय कारको आयात पनि बढेको पाइन्छ ।