१० मिनेट चार्ज गर्दा ४०० किमी यात्रा गर्न सकिने ब्याट्री तयार हुँदै

इलेक्ट्रिक सवारी साधनको ब्याट्री बारम्बार चार्ज गर्नुपर्ने झन्झट अब छिट्टै अन्त्य हुने भएको छ । चिनियाँ कम्पनी सीएटीएलले विश्वको पहिलो लिथियम आइरन फस्फेट ब्याट्री लन्च गर्ने भएको छ, जसलाई ४सी प्रविधिबाट चार्ज गर्न सकिनेछ । यस अनुसार घण्टौ चार्जिङको समयलाई घटाएर अब ब्याट्री कम समयमै चार्ज गर्न सकिने भएको छ ।

सो ब्याट्री चार्ज गरेको १० मिनेटमा ४०० किलोमिटरसम्म ड्राइभ गर्न सकिनेछ । यसलाई फुल चार्ज गर्न १५ मिनेटको समय मात्र लाग्नेछ । कम्पनीले यसमा मोड्युल र ब्याट्रीको केमिस्ट्रीका कारण यो ब्याट्री सुपरफास्ट गतिमा चार्ज गर्न सम्भव भएको दाबी गरेको छ ।

इलेक्ट्रोलाइटको गुणका कारण फास्र्ट चार्ज गर्दा ब्याट्री सामान्य स्तरमा मात्र तात्ने भएकाले यो पूर्णतया सुरक्षित रहेको सीएटीएलले दाबी गरेको छ । कम्पनीले ब्याट्रीको तापक्रम नियन्त्रण गर्न एल्गोरिदम प्रयोग गरेको छ । कम्पनीले ६ हजार ८ सय तरिकाबाट ब्याट्री निरीक्षण गरेर मात्रै तयार गर्ने कम्पनीको भनाइ छ ।

सामान्यतया धेरै चिसो ठाउँमा लिथियम आयोन ब्याट्री चार्ज गर्न धेरै गाह्रो हुन्छ । तापक्रम जति कम हुन्छ ब्याट्री चार्ज हुने समय त्यति नै लामो हुन्छ । यस्तो अवस्थामा सीएटीएलको नयाँ एलएफपी ब्याट्री माइनस १० डिग्रीमा पनि ० देखि ८० प्रतिशतसम्म चार्ज हुन मात्र ३० मिनेट लाग्छ । यो ब्याट्री फुल चार्जमा ७०० किलोमिटरको रेन्ज दिनेछ ।

सो ब्याट्री २०२४ मा लन्च गर्ने तयारी भइरहेको छ । कम्पनीका अनुसार सन् २०२४ को पहिलो त्रैमासिकमा फास्ट चार्ज हुने ब्याट्रीले सुसज्जित नयाँ इलेक्ट्रिक सवारी साधन बजारमा उपलब्ध हुनेछ ।