२०८१ मा नेपाली अटोमोबाइल क्षेत्र : केही आशा, केही निराशा

नेपाली अटोमोबाइल क्षेत्रमा नेपाली वर्ष २०८१ मा केही सन्तोषजनक उपलब्धि भएको मान्न सकिन्छ । पेट्रोलियम पदार्थबाट चल्ने सवारी साधनको बिक्री ठप्प जस्तै भए पनि ईभी बिक्रीले केही उत्साह थपेको छ । पेट्रोलियम पदार्थबाट चल्ने गाडी बिक्री गर्ने दर्जनौ डिलरहरु बन्दको अवस्थामा पुगे भने मोटरसाइकल बिक्रीमा आएको केही सकारात्मक कार्यले धेरै व्यवसायी उत्साहित भए ।

इतिहासमै पहिलो पटक धेरै नयाँ ब्रान्ड नेपाली बजारमा प्रवेश गरे । चीनबाट आयात हुने विद्युतीय सवारी साधनकै कारण अटोमोबाइल बजारमा नयाँ नयाँ इभेन्ट भए । नयाँ कार मोडलको बढ्दो आयातले ईभी किन्नेहरुले धेरै छनोटको सुविधा पाए ।

इन्जिनबाट चल्ने गाडीको आयात घट्दो क्रममै देखियो । चाडपर्वको समयमा भने केही मात्रामा पेट्रोल कारको बिक्री बढ्यो । त्यसबाहेक ईभीसँगको प्रतिस्पर्धामा पेट्रोल र डिजेलबाट चल्ने कारले प्रतिस्पर्धा नै गर्न सकेनन् ।

तर पनि केही सकारात्मक कार्य भने भएका छन् । यो वर्ष नेपाली बजारमा भित्रिएका नयाँ ब्रान्ड मध्ये ट्रायम्फले उत्साहजनक प्रतिफल हासिल गरेको छ । एकै पटक २०० मोटरसाइकल डेलिभरी गरेर चर्चा कमाएको ट्रायम्फले करिव तीन महिनाकै अवधिमा ५०० युनिट मोटरसाइकल डेलिभरी गरेको बताएको छ ।

त्यसैगरी स्कुटर सेगमेन्टमा होन्डा लगायतका केही कम्पनीहरुले राम्रो नतिजा हासिल गरेका छन् । होन्डाका स्कुटर सबैभन्दा बढी बिक्री भएको तथ्य सार्वजनिक भइरहदा टीभीएस र यामाहा लगायतका कम्पनीका स्कुटरले पनि केही सकारात्मक बिक्री हासिल गरेका छन् ।

यद्यपि इलेक्ट्रिक टु ह्विलर सेगमेन्ट भने अपेक्षित बिक्री भएको पाइएको छैन । ग्राहकहरुमा यस्ता सवारी साधनप्रति अझै कन्फिडेन्स उपलब्ध नभएको मानिएको छ ।

इलेक्ट्रिक फोर ह्विलर अर्थात ईभी सेगमेन्टले नै यो वर्ष अटोमोबाइल बजारलाई चलायमान गराउन भूमिका खेलेको देखिएको छ । विश्वमै सर्बाधिक चर्चामा रहेको बीवाईडी देखि हुन्डाई, टाटा, ओमोडा, दिपल, सेरेस, नामी लगायतका ईभी ब्रान्डका विभिन्न मोडल यो वर्ष चर्चामा रहे ।

जेएमईभीको ट्याक्सी भर्सन र सिनोगोल्डको ईभी नेपाल भित्रिएका छन् । यो वर्ष नयाँ खेलाडीको रुपमा हुन्डाई क्रेटा ईभीका साथै टाटाका कर्भ र नेक्सन ईभी फेसलिफ्ट समेत भित्रिएका छन् । यी वाहेक अन्य दर्जनौ मोडल भित्रिएका छन् । दिपल, सेरेस, नामी लगायतका नयाँ मोडलले बजार तताए ।

ईभीमा पनि साना भ्यान अर्थात ईभी माइक्रोबसको बजार बुम भएको मान्न सकिन्छ । देशका विभिन्न स्थानमा आवतजावत गर्नका लागि ११ सिटर देखि माथिका ईभी भ्यानको प्रयोग ह्वात्तै बढेको छ । यसका लागि देशभर विभिन्न स्थानमा चार्जिङ स्टेसन निर्माणले समेत तीव्रता पाएको छ ।

रोचक तथ्य के छ भने यो वर्ष नेपाली बजारमा करोड भन्दा बढी मूल्य पर्ने ईभी पनि प्रशस्तै भित्रिएका छन् । गत वर्ष नेपाल आएका दुई दर्जन ईभी मोडल ८ वटा करोडमाथिका ईभी छन् । जसमा सबैभन्दा महंगो मुल्यको ईभी बीएमडब्लु एक्स७ एक्स ड्राइभ ४० हो । यो कार नेपाल आएको १ हप्ता नबित्दै बिक्री भएको थियो । लक्ष्मी प्रिमियमले ल्याएको सो प्रिमियम एसयूभीको मूल्य ७ करोड हाराहारी पर्ने बताइएको छ ।

करोडमाथिको ईभी आयात गर्ने कम्पनी बीवाईडीको नेपालका लागि आधिकारिक वितरक साइमेक्स इंक पनि हो । कम्पनीले वर्ष २०२४ को सुरुवातमै लक्जरियस सेडान सिल भित्र्याएको थियो । तीन भेरिएन्टमा आएको सिल डाइनामिकको मुल्य १ करोड ५ लाख, प्रिमियमको १ करोड ३९ लाख र पर्फमेन्सको १ करोड ८५ लाख रुपैयाँ पर्छ । बीवाईडी सिलमा ६१.४४ किलोवाट आवरको ब्याट्री प्याक तथा ३९० किलोवाट क्षमताको मोटर जडान गरिएको छ ।

त्यसैगरी १ करोड ८० लाख मूल्यको किया ईभी९, १ करोड ६ लाखको एमजी साइबरस्टर, १ करोड ६० लाखको अवतार ११, १ करोड ५५ लाखको जिकर एक्स, १ करोड ३५ लाखको टेस्ला मोडल ३ फेसलिफ्ट र १ करोड ९ लाख रुपैयाँ मूल्यको स्काइवेल ईटी ५ लगायत ईभीले मूल्यकै कारण चर्चा पाए ।

वर्षको अन्त्यमा सरकारले ल्याएको डाउन पेमेन्ट सम्बन्धी नयाँ नीतिका कारण केही अन्यौलता थपिएको छ । पहिले ईभीका लागि २० प्रतिशत मात्र डाउन पेमेन्ट गरे हुने व्यवस्था भएकोमा यसलाई ४० प्रतिशत पु¥याइएको छ । यो व्यवस्था आईसीई गाडीमा पनि छ ।

२०८२ को अपेक्षा
नेपाली नयाँ वर्ष २०२५ प्रारम्भ हुने क्रममा छ । यो अवस्थामा विश्वभरको प्रभाव नेपाली अटोमोबाइल बजारमा कस्तो पर्ला र नेपाली बजार कस्तो होला भन्ने जिज्ञासा हुनु स्वाभाविक हो ।

यो वर्ष चीनबाट आयात हुने ब्रान्डको संख्या अब बिस्तारै कम हुँदै जाने देखिन्छ । नयाँ आउने ब्रान्ड कमसँगै पुराना गाडी बिक्री गर्न नसक्ने ब्रान्डहरु बन्द हुने सम्भावना समेत छ ।

अहिले विशेषतः बीवाईडी लगायत चिनियाँ सवारी साधनको बिक्री राम्रो रहेको भए पनि अब भने भारतीय उत्पादनको बिक्री बढ्ने अनुमान पनि गर्न सकिन्छ । हुन्डाई र टाटाका साथै सुजुकी र महिन्द्राका ईभीले समेत यो वर्ष चर्चा पाउने अनुमान गर्न सकिन्छ । यसले गर्दा यो क्षेत्रमा प्रतिस्पर्धा पनि बढ्ने छ ।

पेट्रोलियम पदार्थबाट चल्ने सवारी साधनको बिक्री भने यो वर्ष पनि उल्लेख्य मात्रामा बढ्ने अपेक्षा गर्न सकिदैन । सरकारी नीति र अन्य विभिन्न प्रावधानका कारण यसमा असर पुग्ने गरेको छ ।