यस्तो हुनेछ टाटा टियागो फेसलिफ्ट, मे २८ मा लन्‍च हुँदै

टाटा मोटर्सले आफ्नो लोकप्रिय ह्याचब्याक कार टियागो फेसलिफ्ट आगामी मे २८ मा भारतीय बजारमा लन्च गर्ने घोषणा गरेको छ । साथै टियागो ईभी फेसलिफ्ट पनि सोही दिन लन्च गरिनेछ।

नयाँ टियागोको बाहिरी डिजाइनमा केही परिवर्तन गरिएको छ । कारको फ्रन्टमा पातलो ग्रिल, नयाँ एलईडी हेडल्याम्प, शार्प डे-टाइम रनिङ लाइट, नयाँ बम्पर र फगल्याम्प समावेश गरिएको छ, जसले यसलाई अझ आधुनिक र प्रिमियम लुक दिएको छ। साथै रियर भागमा नयाँ टेलगेट डिजाइन, अपडेट गरिएको एलईडी टेलल्याम्प र कनेक्टेड रियर लाइट बार समावेश गरेको छ ।

कारको इन्टेरियरमा १०.२५ इन्चको टचस्क्रिन इन्फोटेनमेन्ट सिस्टम, वायरलेस एन्ड्रोइड अटो, एप्पल कारप्ले र हालको मोडलमा रहेको बेसिक एमआईडीको स्थानमा ७ इन्चको फुल डिजिटल इन्स्ट्रयुमेन्ट क्लस्टर समावेश गरिएको छ । साथै क्लाइमेट कन्ट्रोल, एम्बियन्ट लाइटिङ, सुधारिएको अडियो सिस्टम, नयाँ सिट अपहोल्स्ट्री, फ्रन्ट सेन्टर आर्मरेस्ट र रियर हेडरेस्ट जस्ता फिचर समावेश छ ।

यद्यपि यसको इन्जिनमा भने ठुलो परिवर्तन गरिएको छैन । नयाँ टियागोमा हालकै १.२ लिटर नेचुरली एस्पिरेटेड पेट्रोल इन्जिन उपलब्ध हुनेछ, जसले ८६ पीएस पावर र ११३ एनएम टर्क उत्पादन गर्छ। सो इन्जिन ५ स्पिड म्यानुअल तथा एएमटी गियरबक्स विकल्पसहित आउनेछ। साथै ७५.५ पीएस पावर र ९६.५ एनएम टर्क उत्पादन गर्ने फ्याक्ट्री-फिटेड सीएनजी भेरिएन्ट पनि निरन्तर उपलब्ध रहनेछ।

टियागो ईभी फेसलिफ्टमा हालको १९ किलोवाट आवर ब्याट्री हटाएर बेस भेरिएन्टमै २४ किलोवाट आवर ब्याट्री प्याक र टप भेरिएन्टमा ३० किलोवाट आवरको ठुलो ब्याट्री प्याक दिइने अपेक्षा गरिएको छ, जसले ३६० किलोमिटरभन्दा बढीको रेन्ज प्रदान गर्न सक्छ। साथै नयाँ ६ इन १ आईड्राइभ मोटर पनि अपडेट गरिएको टियागो ईभीमा समावेश हुन सक्ने बताइएको छ।