२०२४ हुन्डाई क्रेटा फेसलिफ्ट : के छ अपडेट ?

हुन्डाई मोटर इन्डियाले २०२४ हुन्डाई क्रेटा लन्च गरेको छ । नयाँ क्रेटाको प्रारम्भिक मूल्य ११ लाख भारु छ र यो सात भेरिएन्टमा उपलब्ध छ । कारको एक्सटेरियरका साथै इन्टेरियरमा पनि धेरै परिवर्तन गरिएको छ ।

सो एसयूभीको बुकिङ सुरु भैसकेको छ । यसको लागि अनलाइन वा नजिकको डिलरसिपमा गएर २५ हजार भारुमा बुक गर्न सकिन्छ ।

२०२४ हुन्डाई क्रेटाको अगाडिको ग्रिल अपडेट गरिएको छ, साथै डीआरएल र स्किड प्लेट पनि समावेश गरेको छ । सो एसयूभीको अलोय ह्विल, पछाडि स्ट्रेच्ड एलईडी लाइट र टेल लाइट पनि अपडेट गरिएको छ । नयाँ क्रेटाको अगाडि र पछाडि टर्न इन्डिकेटर पनि जडान गरिएको छ । सो एसयूभी ६ रङको विकल्पमा उपलब्ध छ ।

सेफ्टीका लागि सो एसयूभीमा ६ एयरब्याग, ३६० डिग्री क्यामेरा, इलेक्ट्रोनिक स्टेबिलिटी कन्ट्रोल र ट्रयाक्सन कन्ट्रोल समावेश छ । इन्टेरियरमा इन्फोटेनमेन्ट सिस्टमका लागि इन्स्ट्रयुमेन्ट क्लस्टर र ट्विन १०–२५ इन्च स्क्रिनका साथै ड्युअल जोन क्लाइमेट कन्ट्रोल, प्यानोरामिक सनरुफ, भेन्टिलेटेड सिट, मल्टी कलर एम्बियन्ट लाइटिङ, बोस साउन्ड सिस्टम, ब्लु लिंक कनेक्टेड कार टेक्नोलोजी पनि समावेश छ ।

नयाँ क्रेटामा १.५ लिटर एमपीआई पेट्रोल मोटर र १.५ लिटर सीआरडीआई डिजेल इन्जिन जडान गरिएको छ । साथै यसमा अब १.५ लिटर टर्बो पेट्रोल इन्जिनमा पनि उपलब्ध छ, जसमा ७ स्पिड डीसीटी युनिटसँग जोडिएको छ ।