बिना ब्याट्री २ हजार किमी रेन्ज दिने इलेक्ट्रिक कार

क्वान्टिनो इलेक्ट्रिक कारमा ब्याट्री छैन जसको कारण यसको निकै चर्चा हुने गरेको छ । ब्रिटेनको नानोफ्लोसेल कम्पनीले यसको निर्माण गरेको हो र यो बाई–आईओएन प्रविधिमा काम गर्छ ।

सो इलेक्ट्रिक कारलाई क्वान्टिनो ट्वान्टी फाइभ नाम दिइएको छ । यसमा लिथियम आयोन ब्याट्रीको सट्टा, समुद्री पानी वा इन्डस्ट्रियल वाटरलाई फ्युलको रुपमा प्रयोग गरिएको हुन्छ ।

यसमा प्रयोग हुने पानीले बायोफ्युल जस्तै काम गर्छ र यो फ्युल विषाक्तरहित, गैर–ज्वलनशील र हानिरहित हुन्छ । साथै यसले वातावरणमा कुनै पनि प्रकारले हानि गर्दैन । यसको प्रविधिबाट बिजुली उत्पन्न हुन्छ र कारको मोटरलाई पावर दिन्छ । पुरा ट्याङ्की भरेपछि कारले २ हजार किलोमिटरको रेन्ज प्रदान गर्न सक्छ ।

कम्पनीले क्वान्टीनो ट्वान्टी फाइभ इलेक्ट्रिक कारको करिब ५ लाख किमीसम्मको परीक्षण गरेको छ । कम्पनीका अनुसार सो कारले ३ सेकेण्डमा ० देखि १०० किमीको गति लिन सक्ने क्षमता छ । इलेक्ट्रिक कार भएकाले यसमा आवाज पनि आउँदैन ।

हाल यो प्रारम्भिक अवस्थामा छ र बजारमा आउन भने समय लाग्ने छ ।