पल्सर २२०एफ : २४ गते भन्दा पहिले किन्दा २० हजार सिधै फाइदा

काठमाडौं – बजाजको नेपालका लागि आधिकारिक वितरक हंसराज हुलासचन्द एन्ड कम्पनीले भृकुटीमण्डपमा हाल बजाज एक्सचेन्ज महामेलाको आयोजना गरिरहेको छ । सो अवसरमा कुनै पनि ब्रान्डको पुरानो मोटरसाइकलसँग नयाँ बजाज मोटरसाइकल साट्न सकिने अफर उपलब्ध छ ।

यस अनुसार पुरानो मोटरसाइकललाई थप १० हजार भ्यालुएसन गरिने कम्पनीको भनाइ छ । नगदमै खरिद गर्न चाहनेलाई १० हजार रुपैयाँ छुट उपलब्ध हुनेछ भने ४० प्रतिशत सम्म डाउन पेमेन्ट गर्नेलाई शून्य प्रतिशत ब्याजदरमा फाइनान्स सुविधा उपलब्ध गराइने छ ।

सो अवसरमा मोटरसाइकलका लागि निःशुल्क एसेसरिज उपलब्ध गराइने छ भने पुराना मोटरसाइकलको निःशुल्क चेकअप समेत गरिने छ । एकै स्थानमा १८ भन्दा बढी भ्यालुएटरबाट भ्यालुएसन गर्न सकिने भएकाले एक्सचेन्ज महामेला आकर्षण बन्न सक्छ ।

बजाजले हालै केही मोटरसाइकलको मूल्य वृद्धि भएको समेत घोषणा गरेको छ । यद्यपि सो मूल्य महामेला सकिए पश्चात अर्थात आगामी जेठ २४ गते पश्चात मात्र लागू हुनेछ ।

यस अनुसार बजाज पल्सर २२०एफको मूल्य हाल ३ लाख ७४ हजार ९ सय रुपैयाँ भएकोमा अब यसको मूल्य २० हजार रुपैयाँ बढेर ३ लाख ९४ हजार ९ सय रुपैयाँ पुगेको छ । यद्यपि आगामी २४ गते सम्म पुरानै मूल्यमा सो मोटरसाइकल उपलब्ध हुनेछ ।

बजाज २२०एफ नेपाली बजारमा निकै नै रुचाइएको मोटरसाइकल हो । यो मोटरसाइकलमा २२० सीसी क्षमताको पावरफुल इन्जिन छ, जसले ८५०० आरपीएममा २०.६४ एचपी पावरका साथै ७००० आरपीएममा १८.५५ एनएम टर्क जेनेरेट गर्छ । यसको इन्जिनमा पाँच स्पिड गियरबक्स लगाइएको छ । पल्सर २२० एफ मोटरसाइकलको टप स्पिड क्षमता प्रतिघण्टा १३४ किलोमिटर रहेको छ ।

सीट हाइट ७९५ एमएम रहेको पल्सर २२० एफको कुल तौल १५५ किलोग्राम रहेको छ भने १६५ एमएमको ग्राउन्ड क्लियरेन्स पाउन सकिन्छ । १५ लिटर क्षमताको इन्धन ट्यांकी रहेको यो मोटरसाइकल अहिले पनि ‘भ्यालु फर मनी’ मोटरसाइकल मानिन्छ ।