होन्डाको दुई नयाँ कार नेपाल आउँदै, यस्तो छ फिचर, पावर र पर्फमेन्स

होन्डा गाडीको नेपालका लागि आधिकारिक वितरक स्याकार ट्रेडिङ कम्पनीले सेडान कार सीटी हाइव्रिड र कम्प्याक्ट एसयूभी एलिभेट नेपाल ल्याउने भएको छ । भारतमा उत्पादन भएका यी दुई कारमध्ये सीटी हाइव्रिड जुलाई महिनाभित्रै नेपाल आइसक्ने र अर्को एसयुभी एलिभेट सेम्टेम्वरसम्म आइपुग्ने कम्पनीले जनाएको छ । यी नयाँ कारको मूल्य कति निर्धारण हुन्छ भन्ने विषयमा कम्पनीले कुनै जानकारी भने दिएको छैन ।

सीटी हाइव्रिड
नेपाली बजारमा उपलब्ध हुने यो पहिलो हाइब्रिड सेडान हुनेछ । यसमा १.५ लिटरको पेट्रोल इन्जिनका साथै २ वटा मोटर र सेशलफ चार्जिङ सुविधा भएको इन्टेलिजेन्ट लिथियम आयोन ब्याट्री छ । आवश्यकता अनुसार यसलाई हाइब्रिड तरिकाले चलाउन सकिन्छ । यसले ९६.५ बीएचपी पावर र १२७ एनएम टर्क जेनेरेट गर्छ ।

१६५ एमएम ग्राउन्ड क्लियरेन्स भएको सो कारको टर्निङ रेडियस ५.३ मिटर र फ्युल ट्यांक ४० लिटर छ । त्यसैगरी यसको बुट स्पेस ३०६ लिटर छ । यसको माइलेज २६.५ किलोमिटर भएको कम्पनीको दावी छ ।

एडीएएस तथा इफिसियन्ट इलेक्ट्रिक रिजेनेरेटिभ ब्रेकिङ सिस्टम लगायत क्रुज कन्ट्रोल, लेन किप असिस्ट सिस्टम, क्विक डिप्लोइमेन्ट टेक्नोलोजी सहितको ६ एयरब्याग, अटोमेटिक ब्रेक होल्ड सिस्टम, अटोमेटिक क्लाइमेट कन्ट्रोल आदि सुविधा यसमा उपलब्ध छन् ।

एलीभेट
कम्प्याक्ट एसयूभीको वढ्दो बजार मागलाई मध्येनजर गरी आउन लागेको एलीभेटमा १.५ लिटर पेट्रोल इन्जिन जडान गरिएको छ । सो इन्जिनले १२१ पीएस पावर र १४५ एनएम टर्क जेनेरेट गर्नसक्ने सामाथ्र्य राख्छ । यो नयाँ एसयूभी ६ स्पिड म्यानुअल र ७ स्पिड सीभीटी ट्रान्समिसनमा उपलब्ध हुनेछ । यसको ग्राउन्ड क्लिरियन्स २२० एमएम रहेको छ ।

एलीभेटमा १०.२५ इन्चको इन्फोटेन्टमेन्ट सिस्टम, ७ इन्चको टीएफटी एचडी कलर मिटर, वायरलेस स्मार्ट फोन चार्जर, एलइडी प्रोजेक्टर हेडल्याम्प, आरामदायी क्याविन, होन्डा सेन्सिङ एडिएएस फिचर, ६ वटा एयरव्याग, भेइकल स्ट्याविलीटी एसिस्ट, हील स्टार्ट एसिस्ट, एविएस, इविडी, इएसएस र रियर पार्किङ सेन्सर लगायत फिचर पाउन सकिन्छ ।

भारतीय बजारमा सो एसयूभी ४ भेरिएन्टमा उपलब्ध रहेपनि नेपालमा कुनकुन भेरिएन्ट आउँछ भन्ने विषयमा अहिले नै प्रष्ट भइनसकेको कम्पनी स्रोतले वताएको छ । भेरिएन्ट अनुसार यसको फिचर समेत फरकफरक रहेको छ । सो एसयुभीले नेपाली बजारमा हुन्डाई क्रेटा र किया सेल्टोससंग सिधा प्रतिस्पर्धा गर्ने देखिन्छ ।