टेस्ला कारमा जुम चलाउन सकिने, कारभित्रै बाट मिटिङ एटेन्ड गर्न सकिने

ट्राफिक जाममा परेर कारकै भित्र बस्न बाध्य भए पनि अब समस्या नहुने भएको छ । अब टेस्ला ड्राइभ गर्नेहरुले गाडीबाट सिधै जुम कलमा ज्वाइन गर्न सक्ने छन् ।

ड्राइभ टेस्ला क्यानडामार्फत गत मंगलबार भएको जुमटोपिया २०२२ मा जुम आफैले यो घोषणा गरेको हो । टेस्लाले यसका लागि आवश्यक कार्य गरिरहेको बताएको छ ।

सन् २०२० अप्रिलमा केही टेस्ला ड्राइभरहरुले सीईओ एलन मस्कलाई कारको इन्टेरियर क्यामेराको प्रयोग गरी जुम मिटिङ प्रयोग गर्न सकिने वारेमा सोधेका थिए । त्यसपछि जुमले यसको वारेमा आधिकारिक धारणा सार्वजनिक नगरे पनि एक महिना पश्चात मस्कले भिडियो कन्फ्रेन्सिङमार्फत यसलाई ‘फ्युचर फिचर’ को रुपमा अवश्य पनि प्रयोग गर्ने बताएका थिए ।

हाल जुमकी ग्रुप प्रोडक्ट म्यानेजर निताशा वालियाले जुम अब ‘अल न्यु टेस्ला मोडल’ का साथ छिट्टै बजारमा आउने बताइन् । उनले प्रस्तुत गरेको छोटो डेमोमा कारको बिल्ट–इन क्यालेन्डर फिचरमार्फत जुम कल एक्सेस गर्न सकिने गरी कारको क्याबिन क्यामेरा तथा अन्यको प्रयोग देखाइएको छ ।

यद्यपि यसका वारेमा अन्य सेफ्टी फिचर तथा थप विवरण भने अझै सार्वजनिक भएको छैन । यसका लागि वाईफाई मात्र प्रयोग गर्न सकिने वा टेस्लाको प्रिमियम कनेक्टिभिटी उपयोग गर्न सकिने वारेमा पनि केही बताइएको छैन । ड्राइभिङ गरिरहेको समयमा भने यसलाई प्रयोग गर्न नसकिने अप्सन पनि हुने अनुमान गरिएको छ ।