हिरो ब्रान्ड खोसिएको एनजीएमले अब जोनसेनका बाइक र स्कुटर नेपाल ल्याउने

काठमाडौं – नेपाली बजारमा लामो समय सम्म हिरोका मोटरसाइकल तथा स्कुटर बिक्री गरिरहेको र केही समय पहिले सीजी मोटर्सबाट डिलर खोसिएको एनजीएम ग्रुपले अब चाइनिज ब्रान्ड जोनसेनका मोटरसाइकल र स्कुटर नेपाली बजारमा बिक्री गर्ने भएको छ ।

केही समय पहिले यस सम्बन्धी सम्झौता सम्पन्न भएर पनि नेपाली बजारमा यी मोटरसाइकल र स्कुटर ल्याउनका लागि आवश्यक प्रक्रिया अगाडि बढिसकेको कम्पनी स्रोतको भनाइ छ । करिव एक महिना भित्रै यो ब्रान्ड नेपाली बजारमा औपचारिक रुपमा भित्रिने अनुमान गरिएको छ ।

ज्योति समूूह अन्तर्गतको नेपाल जनरल मार्केटिङ (एनजीएम) ले यी मोटरसाइकल तथा स्कुटर बिक्री–वितरण गरे पनि आयात भने स्यामुुकापुु ट्रेडिङ प्रालिले गर्नेछ । मणिहर्ष ज्योतिको बुवालाई चीनमा जादा सेतो लुुगा लगाएको भएर चिनियाँहरुले त्यो समयमा स्यामुकापु भन्ने गरेका थिए । उनकै सम्झनामा कम्पनी समेत स्थापना गरिएको हो ।

हाल पहिलो चरणमा होन्डा एक्सएल र हिरो एक्सपल्स जस्ता एड्भेन्चर बाइकसँग प्रतिस्पर्धा हुने खालका जेडएस मोडलका एड्भेन्चर बाइक नेपाली बजारमा उपलब्ध हुनेछन् । त्यसैगरी सबैका लागि उपयुक्त हुने स्कुटर समेत नेपाली बजारमा उपलब्ध हुनेछन् । यी वाहेक डिस्प्लेका लागि केही थान बिग बाइक समेत उपलब्ध हुनेछन् ।

जोनसेनले इलेक्ट्रिक मोटरसाइकल र स्कुटर समेत उत्पादन गर्ने गरेको छ । भविष्यमा यी बाइक पनि नेपाली बजारमा उपलब्ध हुन सक्ने सम्भावना छ । त्यसैगरी नेपालमै यो ब्रान्डका उत्पादन एसेम्बल गर्ने योजना समेत रहेको बताइएको छ ।

चीनका विभिन्न ६ सहरमा उत्पादन हुने जोनसेन ब्रान्डका मोटरसाइकल र स्कुटर नेपाली बजारमा समेत रुचाइने कम्पनीको अनुमान छ । प्लेनको इन्जिन समेत उत्पादन गर्दै आएको जोनसन मोटर कम्पनीका उत्पादन मलेसिया, थाइल्यान्ड, बंगलादेश, श्रीलंका, पाकिस्तान आदि देशमा समेत निर्यात हुने गरेका छन् ।