इलेक्ट्रिक मोटरसाइकलमा फोन कनेक्ट गर्ने फिचर राख्दै नेपाली ब्राण्ड यात्री

काठमाडौं– नेपालली इलेक्ट्रिक टु–ह्विलर ब्राण्ड यात्रीले आफ्नो नयाँ मोडेलको मोटरसाइकलमा वायरलेस एप्पल कारप्ले र एन्ड्रोइड अटो उपलब्ध गराउने भएको छ । सामाजिक सञ्जालमार्फत कम्पनीले नयाँ फिचरको बारेमा जानकारी दिएको हो ।

विद्युतीय बाइकमा यस्तो फिचर नभएको र यात्रीले सार्वजनिक गर्ने नयाँ मोडेलमा यसलाई समावेश गर्न लागिएको कम्पनी स्रोतले बताएको छ । कम्पनीका अनुसार छिट्टै लन्च हुने तयारीमा रहेको पी१ मोडलरको सेकेन्ड जेनेरेसन बाइकमा यो फिचर समावेश गर्न लागिएको हो । प्राय गाडीमा मात्र उपलब्ध हुने यो फिचरलाई इलेक्ट्रिक टु–ह्विलरमा विश्वमै पहिलोपटक उपलब्ध गराउन लागेको कम्पनीले दावी गरेको छ ।

यो फिचर उपलब्ध भएपछि यात्री मोटरसाइकलमा सवार गर्ने राइडरले आफ्नो एन्ड्रोइड वा आईओएस डिभाइसलाई बाइकको डिस्प्लेसंग कनेक्ट गरी त्यसको फाइदा लिन सक्नेछन् । कम्पनीले २०२४ भित्रै नयाँ जेनेरेसनको मोटरसाइकल ल्याउने गरी अहिले विभिन्न चरणमा यसको परिक्षण गरिरहेको छ ।