६० किलोमिटर माइलेज दिने नेपालकै पहिलो हाइब्रिड मोटरसाइकल सार्वजनिक

काठमाडौं–यामाहाले नेपालमै पहिलो पटक हाइब्रिड मोटरसाइकल आधिकारिक रूपमा सार्वजनिक गरेको छ । ४ लाख ९० हजार रुपैयाँ मूल्य निर्धारण गरिएको यामाहा एफजेडएस हाइब्रिडले नेपालको मोटरसाइकल उद्योगमा नयाँ मानक कायम गर्नुका साथै बजारमा पूर्ण रूपमा नयाँ सेग्मेन्टको सुरुवात समेत गरेको वताइएको छ ।

एफजेड सिरिजबाट आएको हाइब्रिड मोटरसाइकल सन् २००८ मा लन्च भएदेखि नै प्रदर्शन र सडक उपस्थितिका लागि परिचित मोडेल हो । यो बलियो विरासतलाई निरन्तरता दिँदै यामाहाले प्रमाणित १४९ सीसी फ्युल–इन्जेक्टेड इन्जिनलाई स्मार्ट मोटर असिस्ट प्रविधिसँग संयोजन गरिएको उन्नत हाइब्रिड प्रणाली प्रस्तुत गरेको छ ।

यो नेक्स्ट–जेनेरेशन हाइब्रिड प्रणालीले परम्परागत दक्षताका अलावा थप क्षमता प्रदान गर्दछ । साधारण मोटरसाइकलको तुलनामा यसले इलेक्ट्रिक असिस्ट मार्फत उच्च गतिको एक्सेलेरेशन, सहज स्टार्ट–स्टप प्रणाली, सुधारिएको इन्धन खपत र कम उत्सर्जन उपलब्ध गराउँछ ।

विशेषगरी सहरी आवागमनका लागि उपयुक्त यो प्रणालीले सुरुवाती गति र कम स्पिडमा सहज पावर डेलिभरी प्रदान गर्छ, जसले नेपालको जस्तो बदलिँदो यातायात आवश्यकताका लागि आधुनिक र व्यवहारिक समाधान दिने दाबी गरिएको छ ।

नेपालभर इन्धनको मूल्यका साथै ट्राफिक जामको समस्या पनि उत्तिकै बढ्दै गइरहेको अवस्थामा हाइब्रिड प्रविधिलाई दैनिक आवागमनका लागि एक अग्रगामी समाधानका रूपमा हेरिएको छ । परम्परागत इन्जिनको विश्वसनीयतालाई स्मार्ट ब्याट्री–असिस्टेड पर्फर्मेन्ससँग संयोजन गरेर यस मोटरसाइकलले ६० किलोमिटरभन्दा बढीको माइलेज, कम सञ्चालन खर्च तथा वातावरणमैत्री राइडिङ अनुभव प्रदान गर्ने दाबी कम्पनीले गरेको छ ।

कार्यक्रममा बोल्दै विष्णु कुमार अग्रवालले यामाहाको दीर्घकालीन दृष्टिकोण प्रस्तुत गरे । “यो अनावरण नेपालमा यामाहाका लागि एक महत्वपूर्ण पाइला हो । हामी मोटरसाइकल सेगमेन्टमा हाइब्रिड प्रविधि भित्र्याएर अझ स्मार्ट र जिम्मेवार प्रदर्शनतर्फ अघि बढिरहेका छौं । यामाहा नेपाली राइडरहरूका लागि उन्नत विश्वस्तरीय प्रविधि ल्याउन प्रतिबद्ध छ” उनले भने ।

नयाँ मोटरसाइकलमा प्रदर्शन, सुरक्षा र आरामलाई ध्यानमा राखेर विभिन्न सुविधाहरू समावेश गरिएको छ । १३५ केजी तौलको हल्का संरचनामा बनेको यो बाइकले राम्रो एजलिटी र पावर–टु–वेट अनुपात प्रदान गर्छ ।

यसमा सिंगल–च्यानल बोश एबीएस, २२० एम एम रियर डिस्क ब्रेक तथा चौडा रेडियल टायर प्रयोग गरिएको छ, जसले राम्रो पकड र स्थिरता दिन्छ । हाइब्रिड असिस्ट प्रणालीले यसको प्रतिक्रिया क्षमतालाई अझ मजवुत बनाउँदै साधारण मोटरसाइकलभन्दा फरक बनाएको छ ।

यस नयाँ मोटरसाइकलमा यामाहाको मौलिक डिजाइन शैली र आधुनिक सुविधाहरू पनि समावेश गरिएको छ । यसमा अलग–अलग हाई र लो बीम भएको एलईडी हेडलाइट, इन्टिग्रेटेड बडी साइडलाइट, दुई तहको सिट, परिष्कृत ध्वनिसहितको मिडशिप मफलर तथा इन्जिन अन्डर काउल उपलब्ध गराइएको छ । जसले सुरक्षा र स्पोर्टी लुक दुवै बढाउँनुको साथै नेगेटिभ एलसीडी इन्स्ट्रुमेन्ट क्लस्टर र ईटुओ फ्युल अड्याप्टिबिलिटी जस्ता आधुनिक सुविधाले यसको भविष्य–उन्मुख डिजाइनलाई अझ स्पष्ट बनाएको छ ।