केही घण्टामै सोल्ड आउट भयो यामाहाको नयाँ क्याफे रेसर बाइक

यामाहाले थाइल्याण्ड मोटर एक्सपोमा पहिलो पटक एक्सएसआर १५५ सार्वजनिक गरेको छ । यो बाइकलाई पहिलो लुकदेखि नै यति धेरै मन पराइएको थियो कि यस बाइकका सबै युनिटहरू लन्च भएको केही घण्टामै बिक्री भइसकेका थिए ।

रुसलेनको रिपोर्ट अनुसार यामाहाले यो बाइकको लिमिटेड एडिसन अन्तर्गत बजारमा १०० युनिट मात्र उपलब्ध गराएको थियो । तर यो बाइक लन्च भएको केही घण्टामै यसको सबै युनिट बिक्री भइसकेको छ । यसको लिमिटेड एडिसन थाइल्याण्डमा लन्च गरिएको थियो ।

सो बाइकको इन्जिन नियो रेट्रो एमटी १५ मोटरसाइकलमा आधारित छ । बाइकमा १५५ सीसी सिंगल सिलिन्डर लिक्विड–कुल्ड इन्जिन जडान गरिएको छ, जसले १९ बीएचपीको पावर र १४.७ एनएमको टर्क जेनेरेट गर्छ । यस बाइकमा ६ स्पिड गियरबक्स दिइएको छ । यसको डिजाइन एक्सएसआर ७०० र एक्सएसआर ९०० जस्तै छ । बाइकमा टियर ड्रप स्टाइल फ्युल ट्यांक र फ्ल्याट सिट जोडिएको छ । कम्पनीले यसमा कैयौं एसेसरिजहरु विकल्पका रूपमा पेश गरेको छ ।

नियो रेट्रो बाइकलाई रेट्रो लुक दिइएको छ । यसमा राउण्ड एलईडी स्प्लिट हेडल्याम्प, मस्कुलर फ्युल ट्यांक, राउन्ड टेलल्याम्प, राउन्ड डिजिटल इन्स्ट्रयुमेन्ट क्लस्टर जस्ता फिचरहरू समावेश गरिएको छ । बाइकमा सिंगल पोड इन्स्ट्रयुमेन्ट क्लस्टर पनि रहेको छ । साथै डिजिटल ट्रिपमिटर, फ्युल मिटर, स्पिडोमिटर, गियर इन्डिकेटर र ट्रिप इन्डिकेटर पनि दिइएको छ ।

यो बाइक यामाहा थाइल्याण्डले जिउस कस्टम्ससँगको सहकार्यमा निर्माण गरेको हो । जसले कस्टम किट विकसित गरेको थियो । जिउस कस्टम्सले एक्सएसआर १५५ लाई कुल रेट्रो क्याफे रेसरमा परिणत गरेको छ । थाइल्याण्डमा यसको मूल्य ९१ हजार ५०० थाइल्याण्ड भाट तोकिएको छ ।

नेपालमा भने यस प्रकारको मोटरसाइकल तत्काल आउने सम्भावना छैन ।