यामाहाले पनि इलेक्ट्रिक स्कुटर ल्याउने, परिक्षणको क्रममा देखियो पहिलो इलेक्ट्रिक स्कुटर ई०१

यामाहाको बहुप्रतिक्षित इलेक्ट्रिक स्कुटर ई०१ को तस्बिर पहिलोपटक बाहिर आएको छ । अनलाइन सञ्चारहरुमा देखिएको यो तस्बिरलाई आधार मान्दा कम्पनीले जापानमा यसको मिडिया टेष्ट राइड अयोजना गरिरहेको अनुमान लगाउन सकिन्छ ।

झट्ट हेर्दा यामाहाकै वाइजेडएफ–आर१ को डिजाइनबाट प्रेरित देखिने यो स्कुटरको डाइमेन्सन हाल कारोबार भैरहेको एनम्याक्स म्याक्सी स्कुटर सरह रहने बुझिएको छ । यसमा जडान गरिएको मोनोक्रेम एलसिडी डिस्प्ले हेर्दा सामान्य देखिएपनि फिचर्स लोडेड हुने बताइएको छ । जहाँ ब्याट्रीको स्टाटस, एबिएस र मोबाइल फोनको सिग्नल देख्न सकिनेछ ।

यो स्कुटरमा १३ इन्चको ह्विल, एबिएस सहितको डिस्क ब्रेक र किलेस इन्ट्री जस्ता बिशेषताहरु दिइएको छ । ब्याट्री प्याक र पावर तथा पर्फमेन्स सहित अन्य बिस्तृत बिबरणहरु सार्बजनिक नगरिएपनि एकपटक चार्ज गर्दा ५० माइलसम्म यात्रा गर्न सकिने अनुमान लगाइएको छ । जापनमा सार्बजनिक गरिएपछि यो बिस्तारै बिश्वका अन्य बजारमा उपलब्ध हुने बताइएको छ ।