अब शाओमीले पनि इलेक्ट्रिक कार निर्माण गर्ने, दर्ता भयो शाओमी ईभी

स्मार्टफोन निर्माता कम्पनी शाओमीले इलेक्ट्रिक कार निर्माण गर्ने भएको छ । कम्पनीले यसको लागि शाओमी ईभी नामले रजिस्ट्रेशन गराएको छ । यसका लागि छुट्टै युनिट गठन भएको छ, जहाँ ३ सय कर्मचारी कार्यरत हुनेछन् ।

लामो समयदेखि शाओमीले इलेक्ट्रिक कार लन्च गर्ने चर्चा चल्दै आइरहेको छ । यसको लुक र फिचर निकै शानदार हुने अनुमान गरिएको छ । शाओमीले इलेक्ट्रिक कार लन्च गरेमा कम मूल्य र राम्रो फिचरको साथमा प्रस्तुत गर्ने अनुमान गरिएको छ । शाओमीले अटोमोबाइल सेक्टरमा हलचल ल्याउने र भारतमा ठूलो बजार स्थापना गर्ने कोशिस गरिरहेको छ । जहाँ समयसँगै इलेक्ट्रिक कारको माग बढिरहेको छ ।

शाओमीले १० वर्षको अन्तरालमा इलेक्ट्रिक भेइकलको लागि प्लानिङ, म्यानुफ्याक्चरिङ र डेभलपमेन्टमा १० बिलियन डलर खर्च गर्ने योजना बनाइरहेको छ । अनुमानित रिपोर्ट अनुसार शाओमीको पहिलो इलेक्ट्रिक कार सेडान वा एसयूभी सेगमेन्टको हुने सम्भावना रहेको छ । कम्पनीका सीईओ र सह सस्थापक ली जूनले शाओमी ईभी नामको नयाँ सब्सिडरी कम्पनीको लागि रजिस्ट्रेशन गराइएको जानकारी दिएका छन् ।

टेस्लाको इलेक्ट्रिक कार चाँडै नै भारतीय बजारमा लन्च गर्ने भएको छ । महिन्द्रा र टाटा जस्ता कम्पनीले पनि निकै आक्रामक तरिकाले इलेक्ट्रिक कार सेगमेन्टमा स्थिति मजबुत बनाउने कोशिस गरिरहेका छन् । यो अवस्थामा शाओमीको इलेक्ट्रिक कार बजारमा आएमा अर्को प्रतिस्पर्धा थपिने निश्चित छ ।