५१० किलोमिटर रेन्ज दिने वुलिङको नयाँ इलेक्ट्रिक कम्प्याक्ट सेडान, यस्ता छन् फिचर

चिनियाँ ईभी निर्माता वुलिङले नयाँ इलेक्ट्रिक कार स्टारलाइट लन्च गरेको छ । बेइजिङमा जारी अटो शोको अवसर पारेर कम्पनीले कम्प्याक्ट सेडान स्टारलाईट लन्च गरेको हो । सो कार यसअघि प्लग–इन–हाइब्रिड भर्सनमा उपलब्ध थियो । स्ट्यान्डर्ड र एड्भान्स एडिसनमा आएको उक्त कारको मूल्य क्रमशः १३ हजार ८०० र १५ हजार १०० डलर पर्ने जनाइएको छ ।

यसको स्ट्यान्डर्ड एडिसनमा ४१.९ किलोवाट आवरको लिथियम आइरन फस्फेट ब्याट्री जडान गरिएको छ । उक्त ब्याट्रीलाई फुल चार्ज गर्दा ४१० किलोमिटर रेन्द दिने दावी गरिएको छ भने ५४.५ किलोवाट आवर क्षमताको ब्याट्री प्याक जडित एड्भान्स एडिसनले ५१० किलोमिटर रेन्ज दिने बताइएको छ । कारको पिक पावर १०० किलोवाट र १५० किलोवाट तथा टर्क २०० र ३१० एनएम छ ।

कारमा १५.६ इन्चको सेन्ट्रल कन्ट्रोल स्क्रिन, ८.८ इन्चको एलइडी इन्स्ट्रयुमेन्ट क्लस्टर, जिपिएस नेभिगेसन, ओटिए अपडेट, भ्वाइस रिकग्निसन कन्ट्रोल, ८ तवरबाट एड्जस्ट गर्न मिल्ने ड्राइभर सिट तथा अगाडी र पछाडी दुबै सिटमा दुई दुईवटा यूएसवी पोर्ट लगायत फिचर दिइएको छ ।

सेफ्टि फिचर अन्तर्गत यसमा एडप्टीभ क्रुज कन्ट्रोल, ट्राफिक साइन रिकग्निसन, अटोमेटिक इमर्जेन्सि ब्रेकिङ, फरवार्ड कोजिन वार्निङ र लेन डिपार्चर वार्निङ जस्ता फिचर सामेल भएको एडास लेभल–२ उपलब्ध छ ।